दाङ ।भारतको हिमाञ्चल प्रदेशस्थित सिम्लामा भएको भीषण सवारी दुर्घटनामा सल्यानको एउटै गाउँका ४ जनाले ज्यान गुमाएका छन् भने ३ जना गम्भीर घाइते भएका छन्।

सल्यान प्रहरी प्रवक्ता इन्सपेक्टर बाबुराम बस्नेतका अनुसार दुर्घटनामा कुमाख गाउँपालिका–४ जिउलाका ३६ वर्षीय राजेश विष्ट, ४८ वर्षीय डिल्ली शाही, ३७ वर्षीय एकेन्द्र शाही र २६ वर्षीया लक्ष्मी शाहीको मृत्यु भएको हो। सोही गाउँका २६ वर्षीय हिमबहादुर शाही, ३६ वर्षीय नेवबहादुर शाही र २२ वर्षीय हेमन्त शाही घाइते भएका छन्।

मृतक र घाइते सबै एउटै गाउँका भएकाले पुरै बस्ती शोकमा डुबेको छ। वडाध्यक्ष शोभिलाल बस्नेतका अनुसार मृतकको शव पोस्टमार्टमपछि नेपाल ल्याइने तयारी भइरहेको छ भने घाइतेहरूको उपचार सिम्लामै भइरहेको छ।

आइतबार बिहान करिब ९ बजे उनीहरू काममा जाँदै गरेका बेला एचपी ६३७८९७ नम्बरको पिकअप गाडी सिम्लाको कोटखाईमा दुर्घटनाग्रस्त भएको थियो।

👉 एउटै गाउँका चारजनाको मृत्यु र तीनजनाको घाइते भएपछि कुमाख गाउँमा शोकको वातावरण छाएको छ। स्थानीयवासीले पीडित परिवारलाई तत्काल राहत र सहयोग उपलब्ध गराउन सरकारसँग अपिल गरेका छन्।

• Jigyasanepal