असार २३, २०८२ | काठमाडौँ । मानवता र सभ्यता दुवैलाई लाजमर्दो बनाउने एउटा हृदयविदारक घटना भारतको बिहारमा घटेको छ। पूर्णियाको राजीगञ्ज पञ्चायतस्थित तेटगामा–१० मा ‘बोक्सी’को आरोपमा एकै परिवारका पाँच जनालाई भीडले कुटपिट गरी पेट्रोल छर्केर जिउँदै जलाइदिएको छ।

निर्दोष नागरिकहरूमाथिको यो अमानवीय अत्याचारले समग्र समाजको मानसिकता र राज्य संयन्त्रको कमजोरीलाई झनै उजागर गरेको छ।

मृतकहरूमा तीन महिला र दुई पुरुष छन्—४८ वर्षीया सीता देवी, ५० वर्षीय बाबुलाल ओराँव, ६५ वर्षीया कातो देवी, २५ वर्षीय मनजित ओराँव र २३ वर्षीया रानी देवी।

‘हजुरआमा बोक्सी हुन्’ भन्ने आरोपले भयो सामूहिक नरसंहार

परिवारका सदस्य सोनुका अनुसार घटनाको सुरु आतङ्ककारी ढङ्गले भयो। उनका अनुसार केही दिनदेखि गाउँमा सोनुकी हजुरआमा कातो देवीले ‘कालो जादू’ गर्दै आएकी छन् भन्ने अफवाह फैलाइएको थियो।

रविवार राति गाउँका मुखिया नकुल ओराँवको नेतृत्वमा करिब २०० जना स्थानीयले बैठक बोलाए। कातो देवीलाई बोक्सीको आरोपमा कटघराबाटै दोषी ठहर गरियो र त्यही भीडले बाबुलाल ओराँवको सम्पूर्ण परिवारलाई एकै ठाउँमा बोलाएर अमानवीय यातना दिन थाल्यो।

लाठी प्रहार, पेट्रोल छर्केर आगो – सबैको सामूहिक हत्या

सुरुमा लाठी प्रहार, त्यसपछि शरीरमा पेट्रोल छर्केर उनीहरूलाई आगो लगाइयो। परिवारका सबै सदस्य एकपछि अर्कै चिच्याउँदै आगोको भुङ्ग्रोमा झसङ्ग नष्ट हुँदै गए।

यसबीच, युवाका छोरा सोनुले भागेर आफ्नो ज्यान जोगाउन सफल भए। उनी नै प्रहरीसम्म पुगे र घटनाको पर्दाफास भयो।

शवलाई सुनसान ठाउँमा लगेर गाडियो

घटना यत्तिमै रोकिन्न। हत्यापछि शवहरूलाई ट्याक्टरमा राखेर सुनसान ठाउँमा लगियो र गाडिएको प्रयास गरियो। यो कार्य योजनाबद्ध ढङ्गले भएको स्पष्ट छ।

दुई जना पक्राउ, तर अन्य दोषी अझै फरार

सोनुको उजुरीका आधारमा ट्याक्टर चालक र गाउँका मुखिया नकुल ओराँवलाई प्रहरीले पक्राउ गरेको छ। तर घटनामा संलग्न अन्य व्यक्तिहरू अझैपनि फरार छन्।

कहाँ छ राज्यको निगरानी ?

२०२५ सालको आधुनिक विश्वमा ‘बोक्सी’जस्तो कुप्रथाको नाममा यस्तो नृशंसता हुनु केवल एक अपराध मात्र होइन, सम्पूर्ण मानवता माथिको कलङ्क हो।

के राज्य, प्रशासन, र समाजको चेतना यस घटनाले झस्काउनेछ ? कि हामी फेरि अर्को अमानवीय घटनाको पर्खाइमा बसिरहनेछौं ?

• Jigyasanepal