पनौती, जेठ १४ । ‘महिनावारीमैत्री समाजका लागि सहकार्य’ भन्ने मूल नाराका साथ पनौती नगरपालिका स्वास्थ्य शाखाको आयोजनामा २०८२ जेठ १४ गते (२८ मे २०२५) विश्व महिनावारी स्वच्छता दिवस भव्य रूपमा मनाइएको छ। कार्यक्रममा नगरभित्रका विभिन्न विद्यालयका किशोरीबीच अन्तरविद्यालयस्तरीय वक्तृत्वकला प्रतियोगिता आयोजना गरियो, जसले किशोरीहरूमा रहेको मौन पीडा, सामाजिक डर र महिनावारीप्रतिको गलत धारणालाई बहसको केन्द्रमा ल्यायो।

'महिनावारी हुँदा किशोरीहरूमा चुनौती' भन्ने विषयमा केन्द्रित प्रतियोगितामा पनौती नगरपालिकाका १२ वडाबाट प्रतिनिधित्व गर्दै २१ जना किशोरीहरू सहभागी भए। उनीहरूले खुलेर महिनावारी अनुभव, सामाजिक व्यवहार, स्वास्थ्य चुनौती र परिवर्तनशील समाजमा युवतीहरूको भूमिका बारे धारणा राखे। किशोरीहरूले आफ्ना व्यक्तिगत अनुभव र सुनेका पीडालाई वाक्चातुर्यमा पोख्नु उनीहरूको आत्मविश्वास र चेतनाको उदाहरण बन्यो।

पनौती–९ स्थित पुष्पाञ्जली बाल समूह सञ्जालकी रस्मिता सापकोटा प्रथम स्थानमा विजयी भइन्।
पनौती–८ सिद्धार्थ वनस्थलीकी कृषला चौरेल दोस्रो स्थानमा र
पनौती–३ कुशादेवी माविकी जस्लिन अधिकारी तेस्रो स्थानमा घोषित भए।

महिनावारी — शरीरको प्राकृतिक प्रक्रिया, तर अझैपनि धेरै किशोरीहरूका लागि लाज, डर र पीडाको पर्याय। यस्ता विषयमा अभिव्यक्ति दिनु आफैंमा ठूलो साहस हो। कार्यक्रममा सहभागी सम्पूर्ण किशोरीहरूले महिनावारीलाई सामान्य, स्वाभाविक र स्वच्छ विषयको रूपमा बुझ्नुपर्ने सन्देश दिँदै आवाज बुलन्द पारे।

पनौती नगरपालिका स्वास्थ्य शाखाले आयोजना गरेको यो कार्यक्रम शिक्षा, स्वास्थ्य र अभिव्यक्ति– तीनै क्षेत्रको संगम बनेको सहभागीहरूले बताए। किशोरीहरूको तर्फबाट आएको आत्मबलिलो आवाजले समाजमा महिनावारीका विषयमा नकारात्मक कुराहरू तोड्न थप मद्दत पुग्ने विश्वास लिइएको छ।

• Jigyasanepal