दैलेख — असार ३, २०८२ 

दैलेखको डुङ्गेश्वर गाउँपालिका–३ मा झोलुङ्गे पुल निर्माणमा वडाध्यक्षको हस्तक्षेपले विकास रोकिएको भन्दै आक्रोशित स्थानीयले वडा कार्यालयमा तालाबन्दी गरेका छन्। तालाबन्दीको अगुवाइ गाउँपालिकाका पूर्वअध्यक्ष नगेन्द्रबहादुर मल्लले गरेका हुन्।

स्थानीयहरूका अनुसार सो वडाको नयाँ टाकुरा खोलामा २५ लाख रुपैयाँ लागतमा निर्माण हुन लागेको झोलुङ्गे पुलको काम विगत तीन महिनादेखि अवरुद्ध छ। निर्माणको जिम्मा लिई काम अघि बढाइरहेको टोलीले २०८१ माघदेखि पुल निर्माण सुरु गरे पनि वडाध्यक्ष कृष्णबहादुर खत्रीले “फजुल खर्च” भन्दै हस्तक्षेप गरेका थिए।

पूर्वअध्यक्ष मल्लले भने, “विकासमा अवरोध गर्ने, राजनीतिक इगोका कारण जनताको जीवन सरल बनाउने काम रोकिनु दुःखद हो। हामी बाध्य भएर तालाबन्दी गरेका हौँ।”

नेपाली कांग्रेसका स्थानीय नेता बखत सापकोटाले वडाध्यक्षको व्यक्तिगत निर्णयका कारण ६० घरधुरीलाई सघाउने यो परियोजना ठप्प भएको आरोप लगाए। उनका अनुसार वडाध्यक्षको स्वेच्छाचारी व्यवहारका कारण गाउँ विकासका लागि आएको स्रोत प्रयोग गर्न पाइएन।

तर वडाध्यक्ष खत्रीको भनाइ फरक छ। उनले भने, “जनताको करको पैसा अनावश्यक रूपमा खर्च नहोस् भनेर मैले काम रोकिएको हुँ। प्रक्रिया मिलाएर काम अघि बढाउनुपर्छ भन्ने मेरो अडान हो।”

सेवाग्राही मर्कामा

वडा कार्यालयमा तालाबन्दी भएपछि दैनिक सेवा लिन आउने सर्वसाधारण मर्कामा परेका छन्। ‘राजनीतिक झगडाले जनताको सेवा रोक्नु उपयुक्त होइन’ भन्दै स्थानीयले दुबै पक्षलाई समस्या समाधानमा गम्भीर बन्न आग्रह गरेका छन्।

• Jigyasanepal