काठमाडौं ।सङ्खुवासभाको पाँचखपन नगरपालिका–२ टाइगरचोकस्थित नागरिक आरोग्य सेवा केन्द्रका इन्चार्ज वैद्य ज्ञानेन्द्र प्रसाद शाहमाथि कुटपिट भएको छ। जिल्ला आयुर्वेद स्वास्थ्य केन्द्र सङ्खुवासभाका प्रमुख रामप्रमोद चौधरीले दिएको जानकारी अनुसार, शाहमाथि आइतबार दिउँसो कार्यालय परिसरमै भीषण जिमीले कुटपिट गरेका हुन्।

जिमीले औषधि किन्ने बहानामा कार्यालयभित्रै इन्चार्ज शाहलाई आक्रमण गरेको आरोप छ। घटनापश्चात् पीडित शाहले स्थानीय प्रहरी पोस्टमा उजुरी दिए पनि आरोपित जिमीलाई सम्झाई बुझाइ मात्र गरेर छोडिएको थियो। तर, जिमीले सोही रात पुनः शाहको कोठामा पुगेर धम्क्याएको पीडितले बताए।

यस घटनापछि शाहले सोमबार इलाका प्रहरी कार्यालयमा औपचारिक उजुरी दिएका छन्। स्वास्थ्यकर्मी र अन्य कर्मचारीमाथि बारम्बार कुटपिट र अभद्र व्यवहार भइरहेका कारण कर्मचारीले सुरक्षा माग गरिरहेका छन्। यसअघि, गत साउन १५ मा पनि नेपाल विद्युत् प्राधिकरण शाखा कार्यालय मादीका इन्चार्ज र एक कर्मचारीमाथि कुटपिट भएको थियो।

• Jigyasa media