काठमाडौं – देशका केही भूभागमा आज हल्का वर्षा र हिमपातको सम्भावना रहेको छ। जल तथा मौसम विज्ञान विभागका अनुसार पश्चिमी वायुको प्रभावका कारण छ वटा प्रदेशमा वर्षा र पाँच वटा प्रदेशमा हिमपात हुन सक्ने अनुमान गरिएको छ।
विभागका अनुसार बिहान देशका पहाडी क्षेत्रहरूमा आंशिकदेखि सामान्य बदली रहेको छ भने अन्य ठाउँमा मौसम सफा छ। केही तराई क्षेत्रहरूमा हुस्सु र कुहिरो लागेको छ।
दिउँसो सुदूरपश्चिम र कर्णाली प्रदेशका केही स्थानमा तथा अन्य प्रदेशका पहाडी भूभागमा मेघगर्जन र चट्याङसहित हल्का वर्षा हुने सम्भावना छ। मधेस प्रदेश बाहेकका सबै प्रदेशमा वर्षा हुनसक्ने अनुमान गरिएको छ।
यसैगरी, सुदूरपश्चिम र कर्णालीका उच्च पहाडी तथा हिमाली भूभागका साथै अन्य केही उच्च क्षेत्रहरूमा हल्का हिमपातको सम्भावना छ। हाल देशमा पश्चिमी वायु तथा न्यूनचापीय प्रणालीको आंशिक प्रभाव देखिएको छ, जसका कारण मौसममा परिवर्तन आउनसक्नेछ।
- Jigyasa media
