धादिङ ।धादिङको गल्छी गाउँपालिका–३ मा मन्दिरमा पानी पुर्याउने क्रममा ट्याक्टर दुर्घटना हुँदा दुई जनाको ज्यान गएको छ।
मृत्यु हुनेमा गजुरी गाउँपालिका–६ निवासी १८ वर्षीय प्रशान्त चेपाङ र २० वर्षीय जयराम चेपाङ रहेका छन्। दुर्घटनामा गम्भीर घाइते भएका उनीहरूलाई प्राथमिक स्वास्थ्य केन्द्र गजुरीमा उपचारका लागि लगिएको भए पनि बचाउन सकिएको थिएन।
बुधबार बिहान आदमघाटबाट गुप्तेश्वर मन्दिरतर्फ पानी लिएर जाँदै गरेको बा.प्र ०१–००४ क ३३५२ नम्बरको ट्याक्टर गुप्तेश्वर भिरस्थित कच्ची सडकमा ब्याक गर्ने क्रममा अनियन्त्रित भई करीब ५०० मिटर तल खसेको थियो।
घटनामा १९ वर्षीय सिरिश चेपाङ र १७ वर्षीय सुरेश चेपाङ गम्भीर घाइते भएका छन्। उनीहरूलाई प्रारम्भिक उपचारपछि थप उपचारका लागि काठमाडौं रेफर गरिएको जिल्ला प्रहरी कार्यालय धादिङका प्रहरी नायब उपरीक्षक प्रकाश हमालले जानकारी दिए।
यसैगरी, दुर्घटनामा संलग्न ट्याक्टर चालक २३ वर्षीय दिनेश चेपाङलाई प्रहरीले नियन्त्रणमा लिएको छ। दुर्घटनाबारे थप अनुसन्धान भइरहेको प्रहरीले जनाएको छ।
- Jigyasa media
