काठमाडौं – देशभर पश्चिमी न्यून चापीय प्रणालीको आंशिक प्रभाव कायम रहेको जल तथा मौसम पूर्वानुमान महाशाखाले जनाएको छ। सुदूरपश्चिम, कर्णाली, गण्डकी र बागमती प्रदेशका केही स्थानमा हल्का वर्षा तथा उच्च पहाडी क्षेत्रमा हिमपातको सम्भावना रहेको छ।
महाशाखाका अनुसार आज दिउँसो अधिकांश भागमा मौसम खुल्नेछ भने पहाडी भूभागमा आंशिकदेखि साधारणतया बदली रहन सक्छ। केही स्थानमा मेघगर्जनसहित हल्का वर्षा हुने अनुमान गरिएको छ।
रातिको समयमा पहाडी भूभागमा आंशिक बदली रहनेछ भने अन्यत्र मौसम सामान्य रहनेछ। उच्च पहाडी तथा हिमाली क्षेत्रमा हल्का हिमपातको सम्भावना रहेको छ।
आगामी २४ घण्टामा पनि पश्चिमी क्षेत्रमा आंशिक बदली रहने भए पनि अधिकांश भागमा मौसम खुल्ने महाशाखाले जनाएको छ। हिमपातका कारण सडक तथा हवाई यातायातमा प्रभाव पर्न सक्ने भएकाले सतर्कता अपनाउन आग्रह गरिएको छ।
- Jigyasa media
