१७ वैशाख, काठमाडौं ।

देशभर फेरि पनि मौसम अस्थिर बन्ने संकेत देखिएको छ। जल तथा मौसम पूर्वानुमान महाशाखाका अनुसार आज देशका धेरैजसो भू-भागमा वर्षा, चट्याङ, हावाहुरी र हिमपातको सम्भावना देखिएको छ।

महाशाखाले जानकारी दिएअनुसार हाल देशमा पश्चिमी वायु, स्थानीय प्रणाली र बङ्गालको खाडीबाट भित्रिएको जलवाष्पयुक्त हावाको प्रभाव सक्रिय रहेको छ।

दिउँसोः

देशका पहाडी क्षेत्रहरूमा आंशिकदेखि सामान्य बदली रहनेछ भने बाँकी भागमा आंशिक बदली रहनेछ। कोशी, बागमती, गण्डकी र कर्णाली प्रदेशका हिमाली क्षेत्रका केही ठाउँमा हल्का वर्षा र हिमपातको सम्भावना छ।

साथै पहाडी भूभागका केही स्थानहरूमा मेघगर्जन र चट्याङसहित हल्कादेखि मध्यम वर्षा हुनसक्ने महाशाखाले जनाएको छ। लुम्बिनी प्रदेशको तराई भूभागमा भने हुरी–बतास चल्ने सम्भावना उच्च रहेको छ।

राति पनि सतर्कता आवश्यक:

आज राति पहाडी भूभागमा आंशिकदेखि सामान्य बदली रहने छ भने अन्यत्र मौसम सफा रहने अपेक्षा गरिएको छ।

कोशी, बागमती, गण्डकी, लुम्बिनी, कर्णाली र सुदूरपश्चिमका पहाडी भूभागहरूमा एक-दुई स्थानमा मेघगर्जन, चट्याङसहित हल्कादेखि मध्यम वर्षा सम्भव छ। हिमाली क्षेत्रहरूमा पनि फाटफुट हिमपात हुने सम्भावना रहेको छ।

महाशाखाको आग्रह:

मौसमको यो अवस्थालाई ध्यानमा राख्दै सतर्कता अपनाउन अनुरोध गरिएको छ, विशेषतः चट्याङ, हावाहुरी र हिमपात हुनसक्ने स्थानमा रहेका नागरिक तथा यात्रुहरूलाई।

• Jigyasanepal