काभ्रे: काभ्रेको धुलिखेल नगरपालिका-२, थिङ्ग गाउँमा सस र चाउमिन बनाउने एक कारखानामा बिहीबार बिहान आगलागी भएको छ। जिल्ला दोलखा तामाकोशी गाउँपालिका-१ घर भएका शम्भु कार्कीले सञ्चालन गर्दै आएको फलामको ट्रस्ट र जस्ताले बनेको टहरामा बिहान करिब ५:३० बजे आगलागी भएको जानकारी प्राप्त भएको हो।

प्रहरीलाई आगलागीको खबर बिहान ५:५५ बजे प्राप्त भएपछि प्रहरी टोली तत्काल घटनास्थलमा खटिएको थियो। स्थानीयहरूको सहयोगमा करिब ६:४५ बजे आगो पूर्ण रूपमा नियन्त्रणमा लिइएको थियो। 

आगलागीले कारखानामा बनाइएको सस, चाउमिन, कच्चा पदार्थ, १९ थान सस र चाउमिन बनाउने मेसिन, र बा ३९ प १७९७ नम्बरको मोटरसाइकलसहित कारखाना पूर्ण रूपमा जलेर नष्ट भएको छ। तर, कुनै पनि मानवीय क्षति भने भएको छैन।

कारखाना सञ्चालक शम्भु कार्कीका अनुसार, उक्त कारखाना बुधबार राति ८:०० बजे बन्द गरिएको थियो र बिहीबार बिहान ५:३० बजे पुनः कारखाना खोल्न जाँदा आगो बलिरहेको अवस्थामा देखिएको थियो। आगलागीको कारण हालसम्म खुल्न सकेको छैन भने क्षतिको विस्तृत विवरण आउन बाँकी रहेको प्रहरीले जनाएको छ।

• Jigyasa media