काठमाडौं। भक्तपुरको मध्यपुर थिमि नगरपालिका–९, बोडेस्थित नीलबाराहीको पिकनिक स्थल नजिक एकजना व्यक्तिको शव फेला परेको छ। मृतकको पहिचान खोटाङका केपिलासगढी गाउँपालिका–२ का ६६ वर्षीय ओमप्रकाश राईको रूपमा भएको छ।
जिल्ला प्रहरी परिसर भक्तपुरका प्रवक्ता, प्रहरी नायब उपरीक्षक (डीएसपी) ढुण्डिराज न्यौपानेले जानकारी दिए अनुसार, मृतकको दाहिने कान र टाउकोमा चोटको निशान देखिएको छ। ओमप्रकाश राई कबाडी सामान टिप्ने काम गर्दै आएका थिए।
डीएसपी न्यौपानेका अनुसार, घटनास्थलमा रगतले लतपतिएको ढुंगा पनि फेला परेको छ, जसको आधारमा घटना हत्याको हो भन्ने आशंका गरिएको छ। "ढुंगा प्रहार गरेर हत्या गरिएको जस्तो देखिन्छ," उनले भने।
मृतक ओमप्रकाश राईका तीन छोराहरू रहेको जानकारी प्राप्त भएको छ। प्रहरीले घटनाको गम्भीरता हेरी थप अनुसन्धान गरिरहेको जनाएको छ।
आखिर कसले किन गरे उनको हत्या ?
- Jigyasa media
