काभ्रेपलाञ्चोक — काभ्रेको पनौती नगरपालिका–७ मा निर्माणाधीन नेपाल प्रहरीको भवनबाट खसेर एक मजदुरको ज्यान गएको छ।
ज्यान गुमाउने व्यक्ति पर्सा जिल्लाको पर्सागढी नगरपालिका–६ घर भएका १९ वर्षीय रितुराज प्रसाद रहेको प्रहरीले जनाएको छ।
शुक्रबार बेलुका काम गर्ने क्रममा दुई तलामाथिबाट खसेर गम्भीर घाइते भएका उनलाई तत्काल शीर मेमोरियल अस्पताल पुर्याइएको थियो। तर उपचारकै क्रममा उनको मृत्यु भएको हो।
स्थानीयहरूले कामदारको सुरक्षाका उपायप्रति प्रश्न उठाउँदै आएका छन्। किनभने केही समयअघि पनि सोही भवनबाट खसेर अर्को मजदुरको ज्यान गएको थियो।
पुनः त्यही स्थानमा यस्तै घटना दोहोरिनुले निर्माणस्थलमा सुरक्षा सावधानीको अभाव देखिएको स्पष्ट छ।
घटनाबारे थप अनुसन्धान भइरहेको जिल्ला प्रहरी कार्यालय काभ्रेले जनाएको छ।
- T
