चितवन, मंसिर ७ - चितवनमा सहकारी ठगी प्रकरणसँग सम्बन्धित मुद्दामा राष्ट्रिय स्वतन्त्र पार्टीका सभापति तथा पूर्वगृहमन्त्री रवि लामिछानेसहित १० जनाविरुद्ध पक्राउ पुर्जी जारी भएको छ।
जिल्ला अदालत चितवनका न्यायाधीश दयाराम ढकालले शुक्रबार पक्राउका लागि आदेश दिएका हुन्। पक्राउ पुर्जी जारी भएकामध्ये नेपाल प्रहरीका पूर्वडीआईजी छविलाल जोशी पनि छन्।
चितवनको साहारा सहकारीका २४ जना पीडितले रवि लामिछाने र अन्यको नाममा पुरक जाहेरी दर्ता गराएका थिए। अदालतले साहारा सहकारीबाट गोर्खा मिडियालगायत ५ वटा कम्पनीमा रकम पठाइएका संस्थाका पदाधिकारी र सञ्चालकहरूलाई पक्राउ गर्न अनुमति दिएको हो।
जिल्ला प्रहरी कार्यालय चितवनका वरिष्ठ प्रहरी उपरीक्षक गौतम मिश्रले घटनाबारे अनुसन्धान अगाडि बढाइएको जानकारी दिएका छन्।
- Jigyasa media
