पोखरा, कात्तिक ६ – पोखरामा लागूऔषधसहित दुई व्यक्तिलाई प्रहरीले पक्राउ गरेको छ। पक्राउ पर्नेमा म्याग्दीका ३० वर्षीय बल बहादुर विश्वकर्मा र धौलागिरी गाउँपालिका–४ की ३५ वर्षीया नर कुमारी घर्ती रहेका छन्।
पोखरा महानगरपालिका–२५ हेम्जामा लागूऔषधको कारोबार भइरहेको सूचनाका आधारमा वडा प्रहरी कार्यालय बगरबाट खटिएको टोलीले स्कुटर चेकजाँच गर्ने क्रममा उनीहरूलाई पक्राउ गरेको हो। सवारी चेकजाँचका क्रममा स्कुटर (ग २५ प ६५८८) रोकी तलासी गर्दा घर्तीको टोपीभित्र लुकाइएको ९३ एम्पुल लागूऔषध फेला परेको हो। प्रहरीले डाईजापाम, फेनेरागन र नुर्फिनका ३१/३१ एम्पुल बरामद गरेको छ।
जिल्ला प्रहरी कार्यालय कास्कीका सूचना अधिकारी वसन्त कुमार शर्माका अनुसार पक्राउ परेकाहरूविरुद्ध लागूऔषध मुद्दामा कास्की जिल्ला अदालतबाट ७ दिनको म्याद थप गरी अनुसन्धान प्रक्रिया अघि बढाइएको छ।
- Jigyasa media
