रियाद – साउदी अरबमा भएको सडक दुर्घटनामा ज्यान गुमाएका तीन नेपाली नागरिकको शव नेपाल पठाइने भएको छ।
नेपाली वाणिज्य दूत सिर्जना अधिकारीका अनुसार, पाल्पाका कृष्ण खत्री, उदयपुरका रूपक कार्की र कपिलवस्तुका मानबहादुर रानाको शव फेब्रुअरी २० र २१ तारिखका दिन नेपाल ल्याउने तयारी गरिएको छ। मृतकका परिवारलाई क्षतिपूर्ति उपलब्ध गराउने प्रक्रियासँगै शव ढिलाइ नगरी पठाउने विषयमा सम्बन्धित कम्पनी र निकायहरूसँग समन्वय गरिएको अधिकारीले जानकारी दिएकी छन्।
सोही दुर्घटनामा गम्भीर घाइते भएका इलामका सुकबहादुर लिम्बुको स्थानीय अस्पतालमा उपचार जारी छ।
गत जनवरी २७ मा साउदीको जिजान सहरस्थित आराम्को रिफाइनरी रोड नजिक कामदार चढेको गाडी र ट्रेलर आपसमा ठोक्किँदा दुर्घटना भएको थियो। घटनामा तीन नेपालीसहित भारतका नौ तथा घानाका तीन गरी कुल १५ जनाको मृत्यु भएको थियो।
मृतकहरू अरेबियन कन्सोलिडेटेड इन्डस्ट्रियल क्लिनिङ सर्भिसेज कर्पोरेसन (ACIC) कम्पनीमार्फत जिजानको आराम्को प्रोजेक्टमा कार्यरत थिए। दुर्घटनामा घाइते भएका अन्य ११ जना विभिन्न मुलुकका नागरिक पनि अस्पतालमा उपचाररत छन्।
शोकाकुल परिवारप्रति गहिरो समवेदना!
- Jigyasa media
