काठमाडौं, फागुन १६ – देशभर पश्चिमी न्यूनचापीय प्रणालीको प्रभाव परेसँगै आज सुदूरपश्चिम, कर्णाली, लुम्बिनी र गण्डकी प्रदेशका विभिन्न स्थानमा बदली भइरहेको छ।
जल तथा मौसम विज्ञान विभागका अनुसार बिहानैदेखि सुदूरपश्चिम र कर्णाली प्रदेशका धेरै स्थानमा मेघगर्जन र चट्याङसहित हल्का वर्षा भएको छ। दिउँसो कर्णाली र सुदूरपश्चिमका पहाडी भूभागमा मध्यम वर्षाको सम्भावना रहेको छ भने लुम्बिनी, गण्डकी र तराई क्षेत्रका केही स्थानमा पनि हल्का पानी पर्न सक्ने अनुमान गरिएको छ।
यसैगरी, सुदूरपश्चिम र कर्णालीका उच्च पहाडी तथा हिमाली क्षेत्रमा व्यापक हिमपातको सम्भावना छ। गण्डकीसहित अन्य प्रदेशका उच्च पहाडी भूभागमा पनि हल्कादेखि मध्यम हिमपात हुने अनुमान गरिएको छ।
विभागले यात्रा तथा दैनिक गतिविधिमा सतर्कता अपनाउन आग्रह गर्दै बदलिँदो मौसमको प्रभावप्रति सचेत रहन सुझाव दिएको छ।
- Jigyasa media
