इनरुवा, वैशाख १ ।सुनसरीको देवानगञ्ज गाउँपालिका–२, रासीमा सोमबार साँझ अचानक गोली चलेपछि स्थानीयवासी त्रसित बनेका छन्। गोली प्रहारमा परेर दुई जना घाइते भएका छन्।
घाइतेहरूमा २४ वर्षीय रवीन्द्र यादव (देवानगञ्ज–२) र शिवुकुमार मेहता (वडा नं. १) रहेको जिल्ला प्रहरी कार्यालय सुनसरीका प्रहरी निरीक्षक दिनेश अधिकारीले जानकारी दिए।
प्रहरीका अनुसार यादवको अवस्था सामान्य छ र उनको स्थानीय क्लिनिकमा उपचार भइरहेको छ। तर, गम्भीर घाइते भएका मेहताको विराटनगरस्थित नोबेल अस्पतालमा उपचार भइरहेको बताइएको छ।
तस्करी समूहको झगडाबाट गोली चल्यो ?
प्रहरीले प्रारम्भिक अनुसन्धानमा तस्करीसँग सम्बन्धित समूहबीचको आपसी विवादले गोलीकाण्ड भएको हुन सक्ने आशंका जनाएको छ। गोली चलाउने व्यक्ति भने अझै पहिचान हुन सकेको छैन। घटनाबारे थप अनुसन्धान जारी रहेको प्रहरी स्रोतको भनाइ छ।
- Jigyasa media
