काठमाडौं — ताप्लेजुङको प्रख्यात धार्मिक स्थल पाथीभरा मन्दिरसम्म पुग्नका लागि प्रस्तावित केवलकार परियोजनाको शिलान्यास शुक्रबार सम्पन्न भएको छ। संविधानसभा सदस्य डम्बरध्वज तुम्बाहाम्फे र फुङलिङ नगरपालिकाका नगरप्रमुख अमिर मादेनले काफ्लेपाटीमा पूजा गर्दै केबलकार निर्माण कार्यको औपचारिक शुरुवात गरेका हुन्।

उल्लेख्य राजनीतिक तथा सामाजिक व्यक्तित्वहरूको सहभागिता रहेको यो कार्यक्रममा पाथीभरा देविको जयजयकारसहित केवलकार निर्माणको सुरुवात गरिएको थियो। निर्माण कम्पनी हिमालय कन्स्ट्रक्सनका प्रमुख इन्द्र केदेमका अनुसार निर्माण कार्य द्रुत गतिमा अघि बढाइनेछ।

केवलकार परियोजनालाई ताप्लेजुङ जिल्लाको आर्थिक, सामाजिक र सांस्कृतिक विकाससँग मात्र नभई, कोशी प्रदेशको समृद्धिको महत्त्वपूर्ण आधार बनाउने योजना रहेको नगरप्रमुख मादेनले बताए। परियोजनाले पर्यटन प्रवर्द्धन र रोजगारी सिर्जनामा टेवा पुर्याउने, साथै स्थानीय पर्यावरणमा पनि सकारात्मक प्रभाव पार्ने आशा गरिएको छ।

केबलकार निर्माणको क्षेत्रका केही रूखहरू पहिले नै हटाइसकिएको र अब १५ महिनाभित्र पाथीभरा मन्दिरसम्म केबलकार सञ्चालन हुने योजना रहेको कम्पनी सञ्चालक रुद्र पौडेलले जानकारी दिए।

• Jigyasa media