कास्की – सूर्यदर्शन सहकारी ठगी प्रकरणमा राष्ट्रिय स्वतन्त्र पार्टीका सभापति रवि लामिछानेसहित सातजना आरोपित विरुद्ध सरकारी वकिलको जवाफी बहस सम्पन्न भएको छ। अब कास्की जिल्ला अदालतले थुनछेक आदेश दिने तयारी गरेको छ।

सरकारी वकिलको जवाफी बहस समाप्त

कास्की जिल्ला अदालतका सूचना अधिकारी सुरज अधिकारीका अनुसार सरकारी वकिलको कार्यालयबाट न्यायाधिवक्ता कमला काफ्ले र उच्च सरकारी वकिल कार्यालयका सहन्यायाधिवक्ता गोविन्द गौलीले जवाफी बहस गरेका थिए। यस प्रकरणमा पुस ६ गतेदेखि थुनछेक बहस सुरू भएको थियो।

रवि लामिछानेसहित सातजना आरोपित

सहकारी ठगी प्रकरणमा रवि लामिछानेसहित पूर्वडीआईजी छविलाल जोशी, लिला पछाई, रामबहादुर खनाल, मीना गुरूङ, कृष्णबहादुर गुरुङ, र आरती गुरूङलाई प्रतिवादी बनाइएको छ। सहकारीको रकम दुरुपयोग र सम्पत्ति शुद्धिकरणको आरोपमा उनीहरू विरुद्ध मुद्दा दर्ता गरिएको छ।

अदालत क्षेत्रमा सुरक्षा कडा

फैसलाको तयारीसँगै कास्की जिल्ला अदालतको सुरक्षा व्यवस्था कडा पारिएको छ। सम्भावित जोखिम रोक्न अदालत क्षेत्रमा भीडभाड गर्न रोक लगाइएको जिल्ला प्रशासन कार्यालयले जनाएको छ।

थुनामै राखेर अनुसन्धान गर्ने वा थुनामुक्त गर्ने?

थुनछेक बहसपछि अदालतले रवि लामिछानेसहितका आरोपितलाई पुर्पक्षका लागि थुनामै राखेर अनुसन्धान जारी राख्ने वा थुनामुक्त गर्नेबारे निर्णय गर्नेछ।

४४ जना प्रतिवादी र सहकारी ठगीको मुद्दा

सहकारी ठगी प्रकरणमा सरकारी वकिलको कार्यालयले रवि लामिछानेसहित ४४ जनाविरुद्ध मुद्दा दायर गरेको छ। यसमा १९ जनामाथि संगठित अपराधको मुद्दा चलाइएको छ। लामिछाने, जोशी, पछाई, गुरूङ र खनालमाथि सम्पत्ति शुद्धिकरणको आरोप पनि लागेको छ।

रवि लामिछाने गत कात्तिक २ गते काठमाडौंबाट पक्राउ परेका थिए। सरकारी वकिलको कार्यालयले यो प्रकरणमा हालसम्म ६३ जनाविरुद्ध मुद्दा दर्ता गरिसकेको जनाएको छ।

सूर्यदर्शन सहकारी ठगी प्रकरणले सहकारी क्षेत्रको विश्वसनीयतामा गम्भीर प्रश्न उठाएको छ। अदालतको आगामी आदेशले यो प्रकरणमा नयाँ मोड

ल्याउने अपेक्षा गरिएको छ।

• Jigyasa media