काठमाडौं — ताप्लेजुङको पाथीभरा (मुक्कुम्लुङ) क्षेत्रमा निर्माणाधीन केवलकार परियोजनासम्बन्धी विवाद समाधान गर्न सरकारले वार्ता टोली गठन गरेको छ। गृह मन्त्रालयका सहसचिव प्रेमप्रसाद भट्टराईको संयोजकत्वमा गठित उक्त टोलीमा संघीय मामिला तथा सामान्य प्रशासन मन्त्रालय, संस्कृति, पर्यटन तथा नागरिक उड्डयन मन्त्रालय, र सहरी विकास मन्त्रालयका प्रतिनिधिहरूसमेत सहभागी छन्।
वार्ता टोलीले तत्काल कार्य प्रारम्भ गर्नेछ भने आन्दोलनरत पक्षलाई संवादमार्फत् समाधान खोज्न आग्रह गरिएको छ। गृह मन्त्रालयका प्रवक्ता रामचन्द्र तिवारीका अनुसार आन्दोलनका कार्यक्रम फिर्ता लिएर वार्तामा सहभागिता जनाउन अपिल गरिएको छ।
गृहमन्त्री रमेश लेखकले ताप्लेजुङ तथा छिमेकी जिल्लाका प्रतिनिधिसभा सदस्यहरूसँग निरन्तर संवाद गर्दै समस्या समाधानका लागि पहल भइरहेको स्पष्ट पारेका छन्। साथै, केवलकार निर्माणसम्बन्धी नीति, कानून र मापदण्ड संघीय मामिला तथा सामान्य प्रशासन मन्त्रालयअन्तर्गत पर्ने भएकाले स्थानीय सरोकारलाई ध्यानमा राखी सबै पक्षहरूसँग समन्वय गरिने मन्त्रालयले जनाएको छ।
- Jigyasa media
