काठमाण्डौ ।
पूर्वी युक्रेनमा रुसले गरेको पछिल्लो आक्रमणमा कम्तीमा १२ जनाको ज्यान गएको छ भने दर्जनौं घाइते भएका छन्। यो घटना अमेरिका र युक्रेनका वार्ताकारहरूबीच साउदी अरेबियामा हुन लागेको युद्धविराम वार्ताको केही दिनअघि भएको हो।
डोनेट्स्क क्षेत्रमा ठुलो क्षति
डोनेट्स्क क्षेत्रको डोब्रोपिलिया सहरमा शुक्रबार राति गरिएको आक्रमणमा ११ जनाको मृत्यु भएको छ भने ३० जना घाइते भएका छन्। युक्रेनी आपतकालीन सेवाका अनुसार रूसी क्षेप्यास्त्र आक्रमणका कारण भवनहरू ध्वस्त भएका छन्।
त्यस्तै, खार्किभ क्षेत्रका सैन्य प्रमुख ओलेग सिनेगुबोभले बोगोदुखिभ सहरमा ड्रोन हमलाबाट एक जनाको मृत्यु भएको जानकारी दिएका छन्। उक्त हमलामा सात जना घाइते भएका छन्।
ट्रम्पको चेतावनी: रूसमाथि नयाँ प्रतिबन्ध र शुल्क
रूसी आक्रमण तीव्र भइरहेका बेला अमेरिकी राष्ट्रपति डोनाल्ड ट्रम्पले रूसमाथि कडा प्रतिबन्ध र कर लगाउने चेतावनी दिएका छन्।
शुक्रबार पत्रकारहरूसँग कुरा गर्दै ट्रम्पले भने, "राष्ट्रपति पुटिनसँग सम्झौता गर्न कठिन भइरहेको छ। युद्धविराम सम्भव नभएमा रूसमाथि कडा आर्थिक नाकाबन्दी लगाउने निर्णय हुन सक्छ।"
उनले आफ्नो सामाजिक सञ्जालमा लेख्दै भने, "रूस र युक्रेन, अब वार्ताको टेबलमा आउनुहोस्।"
रूसको ऊर्जा पूर्वाधारमा आक्रमण, अमेरिका–युक्रेन सम्बन्धमा तनाव
रूसले हालै युक्रेनको ऊर्जा पूर्वाधारमा ठूलो क्षति पुर्याउने गरी ड्रोन र मिसाइल आक्रमण गरेको छ। यसैबीच, ट्रम्प प्रशासनले राष्ट्रपति भोलोडिमिर जेलेन्स्कीसँगको विवादपछि युक्रेनलाई अमेरिकी सैन्य सहायता रोक्ने निर्णय गरेको बताइएको छ।
अमेरिकी नेशनल इकोनोमिक काउन्सिलका निर्देशक केभिन ह्यासेटका अनुसार ट्रम्पको चेतावनी कूटनीतिक रणनीति हो। उनले भने, "राष्ट्रपति ट्रम्प सबै पक्षलाई वार्ताको टेबलमा ल्याउने प्रयास गर्दै हुनुहुन्छ।"
युक्रेनमा जारी तनावसँगै अमेरिका र रूसबीचको सम्बन्ध थप जटिल बन्दै गएको छ।
- Jigyasa media
