म्याग्दी । म्याग्दीको धवलागिरि गाउँपालिका–२ लुलाङमा ट्याक्टर दुर्घटना हुँदा दुईजनाको ज्यान गएको छ भने चारजना घाइते भएका छन्।
गएराति ग १ त ७१९६ नम्बरको ट्याक्टर अनियन्त्रित भई करिब १५० मिटर तल खस्दा १८ वर्षीय देविन विक र २१ वर्षीय पूर्णलाल रसाइलीको मृत्यु भएको जिल्ला प्रहरी कार्यालय म्याग्दीले जनाएको छ।
पूर्णलाल रसाइलीको घटनास्थलमै मृत्यु भएको थियो भने देविन विकको उपचारका क्रममा लुलाङ स्वास्थ्य चौकीमा निधन भएको हो।
दुर्घटनामा घाइते भएका सोही स्थानका कविराज विक र कमल विक, मालिका गाउँपालिका–६ दरबाङका विकास विक तथा धवलागिरि गाउँपालिका–४ का किस्मत विकलाई प्रारम्भिक उपचारपछि थप उपचारका लागि बेनी लगिएको थियो। गम्भीर अवस्थाका एकजनालाई पोखराको मणिपाल अस्पताल रेफर गरिएको प्रहरीले जनाएको छ।
प्रहरीका अनुसार ट्याक्टर सडकबाट करिब डेढसय मिटर तल खसेर दुर्घटना भएको हो। दुर्घटनाबारे थप अनुसन्धान भइरहेको छ।
- Jigyasa media
