काभ्रे । भूम्लू गाउँपालिका-१, भोटेटार माझिगाउँका पशुपालक किसान अहिले बाघ आतंकले त्रसित छन्। स्थानीय समाजसेवी होमराज माझीका अनुसार, नरबहादुर माझीको गोठबाट हिजो राति तीनवटा बाख्रा र आज राति पाँचवटा बाख्रा बाघले मारेको छ। यसअघि पनि भारती टोलमा दिउँसै चराउन लगिएको साइँला भारतीको बाख्रालाई बाघले आक्रमण गरिसकेको थियो।

बाघको आक्रमणबाट रामकुमार माझी र गीता भारतीका खसी-बाख्रा समेत मारिएका छन्। पशु बीमा नगरेकाले उनीहरू थप आर्थिक मारमा परेका छन्। दैनिक गुजाराका लागि सीमित स्रोतमा निर्भर यी किसानहरू बाघ आतंकका कारण थप समस्यामा छन्। कहिले दिउँसै चराउन लग्दा त कहिले बेलुका गोठमै बाघले आक्रमण गर्ने गरेको छ।

स्थानीयहरूले आफूहरू मात्र नभई बालबच्चा समेत असुरक्षित महसुस गरिरहेको गुनासो गरेका छन्। उनीहरूले वडाअध्यक्ष तथा गाउँपालिकालाई सुरक्षाका लागि पहल गर्न माग गरेका छन्। क्षति भएको बाख्राको थोरै भए पनि राहत उपलब्ध गराउन स्थानीयहरूले माग गरेका छन् । 

पछिल्लो समय बाघको आक्रमण ग्रामीण क्षेत्रमा फैलिदै गएको छ । यसबारे गम्भीर ध्यान दिनु आवश्यक छ, किनकि बाघ आतंकले पशुपालन व्यवसायलाई नै थप संकटमा पार्ने खतरा समेत रहेको बताइन्छ ।

• Jigyasa media