बैशाख २४, काठमाडौं | जिज्ञासा नेपाल

भारतले पाकिस्तान र पाकिस्तान अधीनस्त कश्मीरका विभिन्न स्थानमा लक्षित सैन्य कारबाही गरेको छ। भारतीय सेनाले उक्त कारबाहीलाई ‘अपरेसन सिन्दुर’ नाम दिएको छ।

भारतीय रक्षा मन्त्रालयद्वारा जारी विज्ञप्तिअनुसार, कश्मीरको पहलगाममा भएको आतंकवादी आक्रमणमा २५ भारतीय र १ नेपाली नागरिकको ज्यान गएको घटनाको जवाफी कारबाहीस्वरूप पाकिस्तानभित्र रहेका आतंकवादी पूर्वाधारमाथि आक्रमण गरिएको हो।

भारतीय सेनाका अनुसार, यस अपरेसनमा ९ स्थानलाई लक्षित गरिएकामा ती सबै आतंकवादी गतिविधिमा संलग्न पूर्वाधार रहेका थिए। भारतले सैन्य प्रतिष्ठानमाथि भने आक्रमण नगरेको स्पष्ट पारेको छ। “निसानाको छनोट र कारबाहीको प्रकृतिमा उच्च सतर्कता र संयमता अपनाइएको छ,” रक्षा मन्त्रालयद्वारा जारी वक्तव्यमा उल्लेख छ।

यसअघि पाकिस्तानी सञ्चारमाध्यमले आफ्नो सेनाका प्रवक्तालाई उद्धृत गर्दै भारतबाट क्षेप्यास्त्र प्रहार भएको पुष्टि गरेका थिए। पाकिस्तानका विभिन्न क्षेत्रमा शक्तिशाली विस्फोटको आवाज सुनिएको समाचारहरू आएका छन्।

पाकिस्तानी सेनाले भने घटना सम्बन्धमा तत्काल औपचारिक प्रतिक्रिया दिँदै, आफूले उचित समयमा जवाफ दिने चेतावनी दिएको छ। अहिलेसम्म घटनाबाट भएको क्षति, घाइते वा मृतकको आधिकारिक विवरण सार्वजनिक गरिएको छैन। अन्तर्राष्ट्रिय समुदायले घटनाको नजिकबाट निगरानी गरिरहेको जनाइएको छ।

• Jigyasanepal