सिन्धुली, साउन १६  । सिन्धुलीको हरिहरपुरगढी गाउँपालिका–१ बस्तीपुरमा आज दिउँसो परेको अविरल वर्षासँगै आएको पहिरोले सालको ठूलो रुख टहरामा खस्दा दुई बालबालिकाको ज्यान गएको छ भने तीन जना गम्भीर घाइते भएका छन्।

जिल्ला प्रहरी कार्यालय सिन्धुलीका प्रहरी नायब उपरीक्षक सूर्यप्रकाश सुवेदीका अनुसार टहरामा ओत लागिरहेका बेला रुखले किच्दा ९ वर्षीय सार्की थिङ र १६ वर्षीया शन्ता गोलेको घटनास्थलमै मृत्यु भएको हो।

घाइते हुनेहरूमा १४ वर्षीया सिर्जना माया, १५ वर्षीया सन्ध्या भोलन र सात वर्षीय सुशील थिङ रहेका छन्। उनीहरूलाई तत्काल उद्धार गरी उपचारका लागि हेटौँडा अस्पताल पठाइएको प्रहरीले जनाएको छ।

घटनास्थल दुर्गम भएको र अविरल वर्षाले उद्धारमा समेत कठिनाइ भएको जनाइएको छ।

स्थानीय बासिन्दाका अनुसार पहिरोसँगै थुप्रै रुखहरू खसेका छन् र जोखिमयुक्त क्षेत्रमा अझै सतर्कता अपनाउनुपर्ने अवस्था देखिएको छ।

वर्षासँगै आउने प्राकृतिक प्रकोपबाट जनधनको क्षति हुने क्रम बढिरहेको बेला उक्त घटनाले गाउँमा शोक र त्रास फैलिएको छ। स्थानीय प्रशासनले घटनाबारे विस्तृत अध्ययन गरी थप सावधानी अपनाउने तयारी गरिरहेको जनाएको छ।

• Jigyasanepal