सोलुखुम्बु, जेठ १६ — घरेलु विवादले हिंसात्मक रूप लिएपछि सोलुखुम्बुको महाकुलुङ गाउँपालिकामा बाँसको भाटा प्रहारबाट एक व्यक्तिको मृत्यु भएको छ।

घटनामा ज्यान गुमाउने व्यक्ति ४० वर्षीय प्रेम कुमार कुलुङ राई हुन्। उनी महाकुलुङ–२, चंखिदोका स्थायी बासिन्दा थिए।

प्रहरीका अनुसार उनीमाथि सोही स्थानका २६ वर्षीय रघु कुलुङ राईले बिहीबार राति आफ्नै घरमा बाँसको भाटा र लाठीले आक्रमण गरेका थिए। गम्भीर घाइते भएका प्रेम कुमारलाई तत्काल उपचारका लागि महाकुलुङ आधारभूत अस्पताल बुङ लगिएको थियो, तर शुक्रबार बिहान उपचारकै क्रममा उनको मृत्यु भएको हो।

अभियुक्त पक्राउ

घटनाको जानकारी पाएसँगै प्रहरी चौकी बुङबाट खटिएको टोलीले रघु कुलुङ राईलाई पक्राउ गरेको छ। अहिले घटनासम्बन्धी थप अनुसन्धान भइरहेको जिल्ला प्रहरी कार्यालय सोलुखुम्बुले जानकारी दिएको छ।

स्थानीय स्तरमा त्रास

घटना भएको गाउँमा अहिले त्रासको वातावरण छ भने सुरक्षाकर्मीहरूको उपस्थिति बढाइएको छ। स्थानीयवासीहरूले यस्तो हिंसात्मक घटनाले शान्त गाउँमा अशान्ति ल्याएको भन्दै दुःख व्यक्त गरेका छन्।

• Jigyasanepal