काठमाडौं: आईसीसी यू-१९ महिला टी-२० विश्वकप एसिया छनोटको अन्तिम खेलमा नेपाल आज युनाइटेड अरब इमिरेट्स (युएई)सँग प्रतिस्पर्धा गर्दैछ। नेपालले यसअघि पाँच खेल खेलेर चार खेलमा जित हासिल गरेको छ भने एक खेलमा मात्र हार बेहोरेको छ। यसले गर्दा नेपाललाई विश्वकपको छनोट चरण पार गर्न आजको खेलमा युएईलाई प्रभावशाली अन्तरले हराउनुपर्ने चुनौती छ।

नेपालले प्रतियोगितामा थाइल्याण्डलाई ६७ रनले, कुवेतलाई १०८ रनले र चौथो खेलमा थाइल्याण्डलाई पुनः १०६ रनले हराएको थियो। पाँचौ खेलमा कुवेतविरुद्ध १६५ रनको शानदार जित निकालेको नेपाल, केवल आयोजक युएईसँगको तेस्रो खेलमा मात्र १३ रनले पराजित भएको थियो।

हालसम्म पाँच खेलमा चार जितसहित नेपालले ८ अंक हासिल गरेको छ। युएई भने पाँचै खेलमा अपराजित रहँदै १० अंकसहित शीर्ष स्थानमा छ। नेपालले आजको खेलमा जित निकाले पनि रनरेटका कारण युएईसँग उछिनिनुपर्ने छ, जसका लागि ठूलो अन्तरको जित आवश्यक छ।

खेल आज युएईको घरेलु मैदानमा नेपाली समय अनुसार दिउँसो १:३० बजे सुरु हुनेछ। प्रतियोगितामा आयोजक युएईसहित नेपाल, कुवेत र थाइल्याण्ड सहभागी छन्। शीर्ष स्थानमा रहने टोली मात्र अर्को वर्ष मलेसियामा आयोजना हुने आईसीसी यू-१९ महिला टि-२० विश्वकपका लागि छनोटहुनेछ।

• Jigyasa media