मकवानपुर, चैत २१ – मकवानपुरको भीमफेदी गाउँपालिका–१ नयाँ गाउँस्थित सामुदायिक वनमा लागेको डढेलोमा परेर एक जनाको मृत्यु भएको छ।
मृतक ४९ वर्षीय अकिलबहादुर पाख्रिन रहेको जिल्ला प्रहरी कार्यालय मकवानपुरका प्रवक्ता प्रहरी नायब उपरीक्षक श्यामु अर्यालले पुष्टि गरेका छन्।
प्रहरीका अनुसार पाख्रिन गएराति आफ्नी श्रीमती र दाजुसँगै घर नजिकै रहेको बोकेदह सामुदायिक वनको डढेलो गाईगोठसम्म पुगेको छ वा छैन भन्ने हेर्न बारीतर्फ गएका थिए। तर, सोही क्रममा उनी भिरबाट लडेर बेपत्ता भए।
खोजतलास गर्ने क्रममा आज बिहान उनको शव भोर्लाको लहरामा अड्किएको अवस्थामा फेला परेको थियो। डढेलोमा जलेर उनको मृत्यु भएको प्रारम्भिक अनुसन्धानले देखाएको छ।
मृतकको शव परीक्षणका लागि हेटौँडा अस्पताल ल्याइएको छ भने घटनाबारे थप अनुसन्धान भइरहेको प्रहरीले जनाएको छ।
- Jigyasa media
