काठमाडौं । हाल मनसुनको न्यूनचापीय रेखा पश्चिमतर्फ सरदरभन्दा दक्षिणमा तथा पूर्वतर्फ सरदर स्थानको आसपास अवस्थित रहेको जल तथा मौसम विज्ञान विभाग, मौसम पूर्वानुमान महाशाखाले जनाएको छ ।

महाशाखाका अनुसार आज दिउँसो कोशी, मधेश प्रदेशलगायत देशका पहाडी भूभागमा साधारणतया बदली रहनेछ भने बाँकी भूभागमा आंशिक बदली रहनेछ । कोशी, बागमती र गण्डकी प्रदेशका पहाडी भागका केही स्थान र मधेशसहित अन्य पहाडी तथा तराई भूभागका केही स्थानमा मध्यम वर्षा हुने सम्भावना छ ।

यस्तै, कोशी, बागमती र गण्डकी प्रदेशका पहाडी भूभागका एक–दुई स्थानमा भारी वर्षा हुने सम्भावना रहेको महाशाखाले चेतावनी दिएको छ ।

आज राति पनि देशभर साधारणतया बदली रहने अनुमान छ । यस अवधिमा समेत कोशी, बागमती र गण्डकी प्रदेशका पहाडी भागका केही स्थान र अन्य प्रदेशका पहाडी तथा तराईका केही स्थानमा मध्यम वर्षा, साथै केही ठाउँमा भारी वर्षा हुने पूर्वानुमान गरिएको छ ।

महाशाखाले वर्षासँगै पहिरो, गेग्रान बहाव (डेब्रिज फ्लो) र बाढीको जोखिम उच्च हुने चेतावनी दिंदै ठूला तथा साना नदीनाला र खोलामा पानीको सतह बढ्न सक्ने र यातायात क्षेत्रमा प्रतिकूल असर पर्न सक्ने सम्भावनाबारे जानकारी दिएको छ ।

साथै, सम्भावित जोखिमलाई ध्यानमा राखी सबैलाई आवश्यक सतर्कता अपनाउन र पूर्वतयारी गर्न महाशाखाले आग्रह गरेको छ ।

• Jigyasanepal