काठमाडौँ, जेठ ११ — झापा र इलामको सीमावर्ती क्षेत्र माङसेबुङ गाउँपालिका–५ मा विषाक्त च्याउ खाँदा एकै वडाका तीन जनाको ज्यान गएको दर्दनाक घटना सार्वजनिक भएको छ। मृतकमध्ये दुई महिला र एक पुरुष रहेका छन्।

प्राप्त विवरण अनुसार चिया बगानमा उम्रिएको जंगली च्याउ खाएका कारण ५५ वर्षीय अमर लावती, २५ वर्षीया मनिषा लिम्बू र १७ वर्षीया नुमा लावतीको मृत्यु भएको हो। उनीहरूले करिब छ दिनअघि च्याउ सेवन गरेका थिए।

बिरामी परेपछि मनिषा र नुमालाई विराटनगरस्थित विराट नर्सिङ होम पुर्‍याइएको थियो, जहाँ उपचारको क्रममा उनीहरूको ज्यान गयो। अमर लावतीको भने झापाको बिर्तामोडस्थित बिएनसी अस्पतालमा आइतबार निधन भएको हो। बिएनसीका सूचना अधिकारी डा. अनुपम घिमिरेका अनुसार ती च्याउ अत्यन्त विषालु रहेका थिए।

घटनाले गाउँ नै शोकमा डुबेको छ। गाउँपालिका–५ मा तीनजना व्यक्तिको एकैपटक निधन भएपछि स्थानीयवासी स्तब्ध छन्।

यो घटनाले ग्रामीण भेगमा च्याउ सम्बन्धी चेतनाको गम्भीर अभाव देखाएको छ। वर्षायाम सुरु भएसँगै बन, बगान, खेतबारीमा उम्रिने च्याउको पहिचान गर्न नसक्दा हरेक वर्ष देशभरि यस्ता दुःखद घटना दोहोरिन्छन्।

• Jigyasanepal