जिज्ञासा नेपाल | बैशाख २७, २०८२, शनिबार | काठमाडौ

देशभर मौसम अस्थिर बन्दै गएको अवस्थामा जलवायु पूर्वानुमान महाशाखाले आगामी २४ घण्टा जोखिमयुक्त हुन सक्ने भन्दै विशेष चेतावनी जारी गरेको छ। महाशाखाका अनुसार पश्चिमी वायु, स्थानीय वायु र अरब सागरबाट आइरहेको जलवाष्पयुक्त हावाको कारण अहिले देशका विभिन्न भागमा आंशिकदेखि पूर्ण बदली र हल्का वर्षा भइरहेकै छ।

शनिबार साँझ ६ बजे जारी गरिएको बुलेटिनअनुसार—

कोसी, गण्डकी, कर्णाली र सुदूरपश्चिम प्रदेशका पहाडी भूभागमा अहिले हल्का वर्षा भइरहेको छ।

रातिको समयमा देशका पहाडी क्षेत्रका एक-दुई स्थानमा मेघगर्जनसहित चट्याङ र वर्षाको सम्भावना छ।

कोसी, गण्डकी, लुम्बिनी र कर्णाली प्रदेशका हिमाली क्षेत्रमा हल्का वर्षा वा हिमपात पनि हुन सक्छ।

आईतबारको पूर्वानुमान यस्तो छ:

दिउँसो देशका पहाडी भेगमा हल्कादेखि मध्यम वर्षाको सम्भावना।

बाँकी भूभागका केही स्थानमा समेत चट्याङसहित हल्का वर्षा हुन सक्छ।

लुम्बिनी र मधेस प्रदेशको तराई क्षेत्रमा हुरीबतासको सम्भावना छ।

महाशाखाको चेतावनी र सुझाव:

महाशाखाले देशभरका नागरिक, कृषक, चालक तथा यात्रुहरुलाई विशेष सतर्कता अपनाउन आग्रह गरेको छ। विशेषगरी—

मधेस र लुम्बिनी प्रदेशको तराई क्षेत्रमा हावाहुरी आउन सक्ने भएकाले सावधानी अपनाउन भनिएको छ।

सडक तथा हवाई यातायात, कृषि कार्य र स्वास्थ्य सेवामा असर पर्न सक्ने भएकाले पूर्वतयारीमा जुट्न महाशाखाको आग्रह छ।

देशभर मौसम अस्थिर छ। वर्षा, चट्याङ र हावाहुरीको सम्भावना उच्च छ। सजग बनौँ, सुरक्षित रहौँ।

• Jigyasanepal