काठमाडौं। काठमाडौंको बुद्धनगरमा एक व्यक्तिले आफ्नै शरीरमा पेट्रोल छर्केर आत्मदाहको प्रयास गरेका छन्। गम्भीर घाइते भएका उनको वीर अस्पतालमा उपचार भइरहेको प्रहरीले जनाएको छ।
काठमाडौं प्रहरी परिसरका अनुसार बुद्धनगर–१० निवासी ४५ वर्षीय आश्विन राउतले शनिबार बिहान आफ्नै घरको भान्साकोठामा शरीरमा पेट्रोल छर्केर आगो लगाएका हुन्।
प्रहरी परिसर काठमाडौंका प्रवक्ता एसपी पवन भट्टराईका अनुसार घटना बिहान करिब ६:१५ बजे भएको हो। घटनाका बेला राउतकी श्रीमती र छोरा घरमा नरहेको प्रारम्भिक अनुसन्धानबाट खुलेको छ।
प्रहरीले तत्काल उद्धार गरी राउतलाई उपचारका लागि वीर अस्पताल पुर्याएको थियो। चिकित्सकका अनुसार उनको शरीरको करिब ५० प्रतिशत भाग जलेको छ र अस्पतालमा उपचार जारी रहेको छ।
प्रारम्भिक जानकारीअनुसार घटनाअघि राउतको आफ्ना छोरासँग केही विषयमा छलफल भएको बुझिएको भए पनि आत्मदाह प्रयासको वास्तविक कारण भने खुल्न बाँकी रहेको प्रहरीले जनाएको छ।
प्रहरीले घटनाबारे थप अनुसन्धान गरिरहेको जनाएको छ।
-
Jigyasanepal
