काठमाडौं, असार १० — देशभर मनसुन सक्रिय भए पनि अझै कमजोर अवस्थामा रहेकाले बुधबार पनि व्यापक वर्षाको सम्भावना नरहेको मौसमविद्हरूले बताएका छन्। जल तथा मौसम विज्ञान विभागका अनुसार देशका हिमाली तथा पहाडी भूभागमा आंशिकदेखि साधारणतया बदली रहनेछ भने अधिकांश तराई क्षेत्रमा मौसम मुख्यतया सफा रहनेछ।

विभागका अनुसार कोशी, बागमती र गण्डकी प्रदेशका हिमाली तथा पहाडी भूभागका थोरै स्थानमा तथा लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रका एक–दुई स्थानमा मेघगर्जन तथा चट्याङसहित मध्यम वर्षा वा हिमपात हुन सक्ने सम्भावना रहेको छ।

त्यसैगरी कोशी प्रदेशको तराईका थोरै स्थान तथा मधेश, बागमती र गण्डकी प्रदेशका तराईका एक–दुई स्थानमा पनि मेघगर्जन तथा चट्याङसहित मध्यम वर्षा हुन सक्ने अनुमान गरिएको छ।

यता लुम्बिनी र सुदूरपश्चिम प्रदेशका तराई क्षेत्रका केही स्थानमा तातो लहर (Heat Wave) को प्रभाव जारी रहने सम्भावना छ भने बागमती र गण्डकी प्रदेशका तराई क्षेत्रका केही स्थानमा तातो दिन (Hot Day) को अवस्था रहने विभागले जनाएको छ।

आज रातिको समयमा पनि कोशी, बागमती र गण्डकी प्रदेशका हिमाली तथा पहाडी भूभागमा साधारणतया बदली रहनेछ। कोशी र गण्डकी प्रदेशका पहाडी तथा हिमाली क्षेत्रका थोरै स्थानमा तथा बागमती प्रदेशका एक–दुई स्थानमा मेघगर्जनसहित मध्यम वर्षा हुन सक्ने सम्भावना रहेको छ।

मौसमविद्हरूका अनुसार यस वर्ष मनसुन नेपाल प्रवेश गरिसके पनि यसको प्रभाव अझै कमजोर रहेकाले देशभर व्यापक तथा लगातार वर्षाको अवस्था तत्काल देखिने सम्भावना कम छ। तर स्थानीय रूपमा विकसित हुने बादलका कारण केही क्षेत्रमा चट्याङसहित वर्षा हुन सक्ने भएकाले सतर्क रहन आग्रह गरिएको छ।

विशेषगरी पहाडी तथा हिमाली क्षेत्रमा यात्रा गर्ने, खेतीपातीमा संलग्न किसान तथा खुला स्थानमा काम गर्ने नागरिकलाई मौसमको नियमित जानकारी लिएर मात्रै गतिविधि सञ्चालन गर्न विभागले सुझाव दिएको छ।

• Jigyasanepal