काठमाडौं, असार १५ । देशभर मनसुनी गतिविधि क्रमशः सक्रिय बन्दै जाँदा आज देशका विभिन्न स्थानमा वर्षाको सम्भावना रहेको छ। जल तथा मौसम विज्ञान विभागले विशेषगरी कोशी प्रदेशका केही स्थानमा भारीदेखि धेरै भारी वर्षा हुन सक्ने पूर्वानुमान गर्दै बाढी, पहिरो, डुबान तथा हावाहुरीको जोखिमबाट सतर्क रहन सर्वसाधारणलाई आग्रह गरेको छ।

विभागका अनुसार आज दिउँसो देशभर सामान्यदेखि पूर्ण बदली रहनेछ। कोशी, बागमती र गण्डकी प्रदेशका पहाडी तथा हिमाली भूभागका धेरै स्थानमा तथा लुम्बिनी, कर्णाली र सुदूरपश्चिम प्रदेशका पहाडी तथा हिमाली भूभागका केही स्थानमा मेघगर्जन र चट्याङसहित मध्यम वर्षा तथा उच्च हिमाली क्षेत्रमा हिमपात हुने सम्भावना रहेको छ।

यस्तै, देशका तराईका केही स्थानमा पनि मेघगर्जन र चट्याङसहित मध्यम वर्षा हुन सक्ने विभागले जनाएको छ। विशेषगरी कोशी प्रदेशका पहाडी र तराईका एक–दुई स्थानमा भारी वर्षा हुने सम्भावना रहेको छ भने कोशी प्रदेशको तराई र मधेश प्रदेशका केही स्थानमा हावाहुरी चल्न सक्ने चेतावनी दिइएको छ।

राति थप सक्रिय हुनेछ मनसुन

विभागका अनुसार आज राति वर्षाको गतिविधि अझ बढ्ने सम्भावना छ। कोशी, बागमती र गण्डकी प्रदेशका पहाडी तथा हिमाली भूभागका धेरै स्थानमा तथा लुम्बिनी प्रदेशका पहाडी भूभागका केही स्थानमा मेघगर्जन र चट्याङसहित मध्यम वर्षा हुने सम्भावना रहेको छ।

त्यसैगरी कर्णाली र सुदूरपश्चिम प्रदेशका पहाडी भूभागका थोरै स्थान तथा हिमाली क्षेत्रका एक–दुई स्थानमा पनि वर्षा हुन सक्ने अनुमान गरिएको छ।

रातिको समयमा मधेश, कोशी, बागमती र गण्डकी प्रदेशका तराईका धेरै स्थान तथा लुम्बिनी र सुदूरपश्चिमका तराईका केही स्थानमा मेघगर्जनसहित वर्षा हुने सम्भावना छ।

विभागले कोशी प्रदेशका थोरै स्थानमा भारीदेखि धेरै भारी वर्षा हुने सम्भावना रहेको जनाएको छ। साथै मधेश, बागमती र गण्डकी प्रदेशका एक–दुई स्थानमा पनि भारी वर्षा हुन सक्ने अनुमान गरिएको छ।

यस्तै कोशी, बागमती, गण्डकी र लुम्बिनी प्रदेशका तराई क्षेत्र तथा मधेश प्रदेशका केही स्थानमा हावाहुरी चल्न सक्ने भएकाले आवश्यक सावधानी अपनाउन आग्रह गरिएको छ।

मनसुन विस्तार हुने क्रम जारी

हाल कोशी, मधेश र बागमती प्रदेशका सम्पूर्ण भूभाग, गण्डकी प्रदेशका केही भूभाग तथा लुम्बिनी प्रदेशको पूर्वी क्षेत्रमा मनसुनी वायु सक्रिय रहेको विभागले जनाएको छ। अन्य क्षेत्रमा भने पश्चिमी वायु र स्थानीय वायुको आंशिक प्रभाव कायम छ।

मौसमविद्का अनुसार आगामी दुईदेखि तीन दिनभित्र गण्डकी र लुम्बिनी प्रदेशका बाँकी भूभाग, कर्णाली तथा सुदूरपश्चिम प्रदेशभर पनि मनसुन विस्तार हुने सम्भावना रहेको छ।

सतर्कता अपनाउन आग्रह

मौसम विभागले भारी वर्षा, चट्याङ, हावाहुरी, बाढी, पहिरो तथा डुबानको जोखिमलाई मध्यनजर गर्दै नदी तथा खोलानाला आसपास नजान, पहिरोको जोखिम भएका क्षेत्रमा विशेष सावधानी अपनाउन तथा यात्रा गर्दा मौसमसम्बन्धी पछिल्लो सूचना पालना गर्न सर्वसाधारणसँग अनुरोध गरेको छ।

• Jigyasanepal