काभ्रे, वैशाख २२ । काभ्रेपलाञ्चोकमा सडक विस्तारका क्रममा भएको पहिरोले स्काभेटर पुरिँदा चालकको ज्यान गएको छ।
मंगलबार दिउँसो करिब ३ बजे चौरी देउराली गाउँपालिका–७ टाडिगाउँस्थित मध्यपहाडी लोकमार्गअन्तर्गत सडक खन्ने क्रममा माथिबाट ढुङ्गासहितको ठूलो ढिस्को खस्दा बा २ क २७९२ नम्बरको स्काभेटर पुरिएको हो।
दुर्घटनामा स्काभेटर चालक रौतहटको पौराही गाउँपालिका–३ निवासी ४१ वर्षीय दिलिप स्माली क्याबिनभित्रै च्यापिएर घटनास्थलमै मृत्यु भएको जिल्ला प्रहरी कार्यालय काभ्रे ले जनाएको छ।
सडक विस्तारका लागि ट्रयाक खन्ने क्रममा अचानक माथिबाट खसेको ढिस्कोले स्काभेटर पूर्ण रूपमा पुरिएको प्रहरीले जनाएको छ।
घटनापछि स्थानीयवासी र सुरक्षाकर्मीले उद्धार प्रयास गरे पनि चालकको ज्यान जोगाउन नसकिएको बताइएको छ। प्रहरीले घटनाबारे थप अनुसन्धान गरिरहेको छ।
-
Jigyasanepal
