काठमाडौं । रोल्पाको थवाङ गाउँपालिका–१ जलजलामा भएको भीषण सवारी दुर्घटनामा मृतकको संख्या २० पुगेको छ। बिहीबार रुकुम पूर्वबाट जलजलातर्फ जाँदै गरेको लु १ ज ४१६७ नम्बरको बोलेरो भीरबाट खस्दा ठूलो मानवीय क्षति भएको हो।

जिल्ला प्रहरी कार्यालय रोल्पाका प्रहरी निरीक्षक सुनिल थापा नेपालीका अनुसार दुर्घटनामा १७ जनाको घटनास्थलमै मृत्यु भएको थियो भने थप तीन जनाको उपचारका क्रममा मृत्यु पुष्टि भएसँगै मृतक संख्या २० पुगेको हो।

प्रहरीका अनुसार वैशाख पूर्णिमाको अवसरमा लाग्ने मेलामा सहभागी हुन रुकुम पूर्वबाट गएका यात्रुहरू सवार बोलेरो सडकबाट करिब ८०० मिटर तल खसेको थियो।

दुर्घटनापछि तत्कालै प्रहरी टोली परिचालन गरी उद्धार कार्य सुरु गरिएको छ। यद्यपि दुर्गम क्षेत्र र नेटवर्क समस्याका कारण घटनाको विस्तृत विवरण आउन बाँकी रहेको प्रहरीले जनाएको छ।

प्रहरीले घाइतेहरूको उद्धार तथा थप जानकारी संकलनको काम जारी रहेको जनाएको छ।

• Jigyasanepal