काठमाडौं, असार ४ । नेपालमा मनसुन भित्रिने औसत मिति नाघेको छ दिन बितिसक्दा पनि यस वर्ष मनसुन औपचारिक रूपमा प्रवेश गर्न सकेको छैन। तर मौसमविद्हरूले अब मनसुन चाँडै नेपाल भित्रिने अनुमान गरेका छन्।

मौसम पूर्वानुमान महाशाखाका मौसमविद् हरिप्रसाद दाहालका अनुसार मनसुनको गतिविधिलाई निरन्तर अनुगमन गरिँदै आएको छ र हालको अवस्थाले मनसुन छिट्टै नेपाल प्रवेश गर्ने संकेत देखाएको छ।

उनका अनुसार मनसुन प्रवेशको सम्भावना बलियो देखिए पनि ठ्याक्कै कुन दिन नेपाल भित्रिन्छ भन्ने यकिन गर्न भने अझै सकिने अवस्था छैन। मौसमीय प्रणालीमा अचानक परिवर्तन आउन सक्ने भएकाले केही समय थप पर्खनुपर्ने उनले बताए।

नेपालमा मनसुन भित्रिने औसत मिति जुन १३ (जेठ ३०) मानिन्छ। यस वर्ष भने निर्धारित समयभन्दा केही ढिला भएको छ।

आजको मौसम कस्तो रहनेछ?

दिउँसो

देशका हिमाली तथा पहाडी भूभागमा सामान्यदेखि आंशिक बदली रहनेछ। कोशी र मधेस प्रदेशका तराई क्षेत्रमा आंशिक बदली रहने अनुमान गरिएको छ भने बागमती, गण्डकी, लुम्बिनी र सुदूरपश्चिमका अधिकांश तराई क्षेत्रमा मौसम मुख्यतया सफा रहनेछ।

कोशी, बागमती र गण्डकी प्रदेशका हिमाली तथा पहाडी भूभागका थोरै स्थानमा तथा लुम्बिनी, कर्णाली र सुदूरपश्चिम प्रदेशका हिमाली तथा पहाडी क्षेत्रका एक–दुई स्थानमा मेघगर्जन तथा चट्याङसहित मध्यम वर्षाको सम्भावना रहेको छ। उच्च हिमाली क्षेत्रमा हल्का हिमपात हुन सक्ने अनुमान गरिएको छ।

यस्तै, कोशी र मधेस प्रदेशका तराईका एक–दुई स्थानमा पनि मेघगर्जनसहित वर्षा हुन सक्नेछ। लुम्बिनी र सुदूरपश्चिम प्रदेशका केही तराई क्षेत्र तथा बागमती र गण्डकी प्रदेशका थोरै तराई भूभागमा तातो दिनको प्रभाव कायम रहने सम्भावना छ।

राति

रातिको समयमा कोशी प्रदेशमा सामान्य बदली रहनेछ भने अन्य हिमाली तथा पहाडी क्षेत्रमा आंशिक बदली र अधिकांश तराई क्षेत्रमा मौसम मुख्यतया सफा रहने अनुमान गरिएको छ।

कोशी प्रदेशका हिमाली तथा पहाडी भूभागका थोरै स्थान तथा बागमती र गण्डकी प्रदेशका हिमाली तथा पहाडी क्षेत्रका एक–दुई स्थानमा मेघगर्जन, चट्याङसहित मध्यम वर्षा तथा हिमपातको सम्भावना रहेको छ। साथै कोशी प्रदेशका तराईका केही स्थानमा पनि वर्षा हुन सक्ने मौसमविद्ले बताएका छन्।

सतर्क रहन आग्रह

मौसमविद्हरूले वर्षा, चट्याङ तथा पहाडी क्षेत्रमा हुन सक्ने पहिरोको जोखिमलाई ध्यानमा राख्दै आवश्यक सतर्कता अपनाउन सर्वसाधारणलाई आग्रह गरेका छन्। विशेषगरी यात्रा गर्ने, खेतीपातीमा संलग्न किसान तथा नदी तटीय क्षेत्रमा बसोबास गर्ने नागरिकलाई मौसमको अद्यावधिक जानकारी लिन सुझाव दिइएको छ।

• Jigyasanepal