काठमाडौं । नेपालमा अहिले पश्चिमी वायु र स्थानीय वायुको प्रभाव सक्रिय रहेकाले देशका विभिन्न भू–भागमा वर्षा तथा हिमपातको सम्भावना देखिएको छ। जल तथा मौसम विज्ञान विभागअन्तर्गत मौसम पूर्वानुमान महाशाखाले बुधबार बिहान सार्वजनिक गरेको विवरणअनुसार देशका पहाडी तथा हिमाली क्षेत्रमा साधारणतया बदली रहेको छ भने अधिकांश तराई क्षेत्रमा मौसम मुख्यतया सफा रहेको जनाएको छ।

महाशाखाका अनुसार बुधबार पश्चिमी वायु र स्थानीय वायुको प्रभावकै कारण केही जिल्लामा भारी वर्षासमेत भएको थियो। आज पनि कोशी, बागमती र गण्डकी प्रदेशका हिमाली तथा पहाडी क्षेत्रमा बदली रहने सम्भावना छ। साथै मधेस प्रदेशसहित बागमती र गण्डकीका तराई भू–भाग तथा अन्य प्रदेशका पहाडी क्षेत्रमा आंशिक बदली रहने मौसमविद्ले बताएका छन्।

आज दिउँसो कोशी, बागमती र गण्डकी प्रदेशका हिमाली तथा पहाडी भू–भागका थोरै स्थानमा मेघगर्जन र चट्याङसहित मध्यम वर्षा हुने सम्भावना रहेको छ। यस्तै मधेस प्रदेश तथा लुम्बिनी र कर्णाली प्रदेशका पहाडी क्षेत्रमा पनि हल्कादेखि मध्यम वर्षा हुन सक्ने आकलन गरिएको छ। उच्च हिमाली क्षेत्रमा हिमपातको सम्भावना पनि रहेको मौसम महाशाखाले जनाएको छ।

मौसमविद्का अनुसार सुदूरपश्चिम र लुम्बिनी प्रदेशका तराई तथा पहाडी क्षेत्रमा तातो दिनको सम्भावना रहेकाले गर्मी बढ्न सक्ने देखिएको छ।

आज राति पनि कोशी, बागमती र गण्डकी प्रदेशका हिमाली तथा पहाडी क्षेत्रमा साधारणतया बदली रहनेछ भने मधेस प्रदेशलगायत अन्य पहाडी भू–भागमा आंशिक बदली कायम रहने मौसम विभागको प्रक्षेपण छ।

महाशाखाले कोशी, बागमती र गण्डकी प्रदेशका केही स्थान तथा मधेस प्रदेशका एक–दुई स्थानमा मेघगर्जन, चट्याङसहित वर्षा हुन सक्ने भएकाले सतर्कता अपनाउन आग्रह गरेको छ। हिमाली क्षेत्रमा हिमपातको सम्भावना रहेकाले उच्च भेगका स्थानीय तथा यात्रुलाई सावधानी अपनाउन सुझाव दिइएको छ।

• Jigyasanepal