काठमाडौं, साउन १३ । आज आषाढ शुक्ल पूर्णिमा, अर्थात् गुरुपूर्णिमा पर्व देशभर श्रद्धा, सम्मान र भक्तिभावका साथ मनाइँदै छ। यस दिन शिक्षा, दीक्षा, संस्कार तथा जीवनको सही मार्ग देखाउने गुरुजनप्रति कृतज्ञता व्यक्त गर्ने परम्परा रहिआएको छ।
वैदिक परम्पराअनुसार महाभारतका रचयिता तथा वेदहरूको संहिताकरण गर्ने महर्षि वेदव्यासको जन्मजयन्तीका अवसरमा मनाइने व्यास जयन्ती नै गुरुपूर्णिमाका रूपमा प्रख्यात छ। त्यसैले आजको दिनलाई ज्ञान, शिक्षा र आध्यात्मिक चेतनाको विशेष पर्वका रूपमा लिने गरिन्छ।
गुरुपूर्णिमाका अवसरमा शिष्यहरूले आफ्ना गुरुजनलाई भेटी, मिष्ठान्न तथा सम्मान अर्पण गर्दै आशीर्वाद लिने परम्परा छ। विद्यालय, क्याम्पस, गुरुकुल तथा विभिन्न संघ–संस्थाले पनि विशेष कार्यक्रम आयोजना गरी गुरुहरूको योगदानको सम्मान गरिरहेका छन्।
धर्मशास्त्र र तन्त्रशास्त्रका अनुसार ‘गु’ को अर्थ अन्धकार र ‘रु’ को अर्थ प्रकाश हो। अज्ञानरूपी अन्धकार हटाई ज्ञानरूपी प्रकाश प्रदान गर्ने व्यक्तिलाई ‘गुरु’ भनिन्छ। त्यसैले गुरुलाई जीवनको मार्गदर्शक, संस्कारदाता र प्रेरणाको स्रोतका रूपमा सम्मान गरिन्छ।
नेपाली समाजमा गुरुको स्थान आमा–बुबापछिको उच्च स्थानमा मानिन्छ। जीवनमा सही ज्ञान, नैतिकता र सकारात्मक सोचको विकासमा गुरुको भूमिका अतुलनीय रहने विश्वास छ।
यस पावन अवसरमा गुरुजनप्रति सम्मान, कृतज्ञता र आदर व्यक्त गर्दै देशभरका शिक्षण संस्था तथा धार्मिक स्थलहरूमा विभिन्न कार्यक्रम सम्पन्न भइरहेका छन्। साथै आफ्ना गुरुबाट आशीर्वाद ग्रहण गर्दै ज्ञान, अनुशासन र सदाचारको मार्गमा अघि बढ्ने संकल्पसमेत व्यक्त गर्ने गरिन्छ।
"गुरु बिना ज्ञान छैन, ज्ञान बिना उज्यालो छैन।"
सम्पूर्ण गुरुजनमा हार्दिक सम्मान तथा गुरुपूर्णिमाको शुभकामना।
-
Jigyasanepal
