काठमाडौँ । काठमाडौँ उपत्यकामा गएरातिदेखि नै मौसम बदली भई विभिन्न स्थानमा हल्का वर्षा भइरहेको छ। मंगलबार बिहानसम्म पनि उपत्यकाका केही क्षेत्रमा पानी परिरहेकाले मौसम चिसो र आकाश धुम्मिएको देखिएको छ।

मौसम पूर्वानुमान महाशाखाका मौसमविद् हरिप्रसाद दाहालका अनुसार बिहान ७ बजेसम्म काठमाडौँका एक–दुई स्थानमा हल्का वर्षा भइरहेको छ। अहिलेको वर्षा केही समयपछि रोकिने सम्भावना रहे पनि दिउँसोपछि पुनः बादल बढ्दै जाने र अपराह्न वा साँझपख फेरि हल्का वर्षा हुन सक्ने अनुमान गरिएको छ।

महाशाखाका अनुसार आज दिनभर काठमाडौँ उपत्यकाको मौसम घाम–बादल र बादल–घामको मिश्रित अवस्थामा रहने सम्भावना छ। बिहानको मौसम खुलेजस्तो देखिए पनि दिउँसोपछि पुनः बदली बढ्ने भएकाले बाहिर निस्कँदा सतर्कता अपनाउन मौसमविद्ले सुझाव दिएका छन्।

पछिल्ला केही दिनदेखि पश्चिमी वायु र स्थानीय वायुको प्रभावका कारण देशका विभिन्न स्थानमा वर्षा भइरहेको छ। यसकै प्रभावले काठमाडौँ उपत्यकामा पनि मौसम परिवर्तन भइरहेकाे मौसमविद्को भनाइ छ।

मौसम पूर्वानुमान महाशाखाले बिहान ८ बजे देशभरको विस्तृत मौसम बुलेटिन सार्वजनिक गर्ने जनाएको छ। मौसमविद्हरूले विशेषगरी अपराह्नपछि हुने सम्भावित वर्षा र चट्याङबाट सावधानी अपनाउन आग्रह गरेका छन्।

• Jigyasanepal