✍🏼नवीन प्यासी

तिमी नहुनुले केही फरक नपार्दो रहेछ

उस्तै छ यो बाटो  

जहाँबाट सधैंको लागि तिम्रो पाइतालाहरु अस्ताए

उस्तै छ यो आकाश

जहाँबाट 

उसैगरी खस्छ झरी 

सायद तिमी यही भूगोलको कुनै कुनामा हात फिँजाएर

उसैगरी रुझाइरहेकी हौली 

कुनै मन्दिरको टुँडालमा कोरिन नसकेका तिम्रो गोप्य अंगहरु

उस्तै छन् यी ऋतुहरु

उसैगरी नियतिको परिधिमा फक्रन्छन् फूलहरु 

उसैगरी बज्छन् सर्याक-सुरुक गरेर भूइँमा खसेका पातहरु 

मैले तिमी नजिक आएको महसुस गर्न नपाएको मात्र हो

तिमी नहुनुले केही फरक नपार्दो रहेछ 

सबैसबै उस्तै छन्, म उस्तै छु 

फेरिएको त निर्मम क्यालेन्डरहरु मात्र छन्

र पनि हरेक दिवसहरु, नयाँवर्षहरु, जन्मोत्सवका दिनहरु उस्तै छन् 

बस् ती दिनहरुको बाटो भएर तिम्रो मुस्कान नफर्किएको मात्र हो

तिमी नहुनुले ममा भने केही अर्थ राख्दो रहेछ 

जस्तो आदतहरु मौसमी भएका छन्

निद्राहरु कतै महा शुन्यताको दरबारमा चाकरी गर्न गएका छन् 

हाँसोहरु कुनै पागलखानाको संवेदनाहीन कोठामा भर्ति भएका छन्

जाँगरहरु जिन्दगीको सुनियोजित दुर्घटनापछि कोमामा गएका छन्

र पनि उस्तै छ

सिसाको कारागारभित्र कैद हामी दुईको तस्बिर 

उस्तै छन् तिमीले दिएका 

कलेजी मफलरहरु, गुलाफहरु...

उस्तै छ तिम्रो नाममा लेखेको कविता 

जुन जविताले तिमी नहुनुको क्षतिपूर्ति तिरिरहन्छ हरक्षण 

कुनै दिन हराउने छ 

आँसु पिएर मोटाएको सिरानीबाट यो कविता

या चोरी हुनेछ

या जानाजान हराउनेछु/चोरी गराउनेछु

म स्वयम् पनि म जस्तो हुने छैन 

त्यसबेला तिमी नहुनुले झनै  केही फरक पार्ने छैन 

बरु फरक त 

तिमीप्रतिको समर्पणको प्रतिकुलतामा 

अनुकुलताको दियो जलाउने कोही नहुनुले फरक पार्नेछ

थाहा त अवश्य नै होला तिमीलाई 

आदतहरु फेरिने गर्छन्/प्राथमिकताहरु फेरिने गर्छन्

जस्तो तिम्रो आदतबाट म हटेँ/तिम्रो प्राथमिकताबाट म छुटेँ  

यो दुनियाबाट म छुट्नेछु/तिमी पनि छुट्नेछौ 

छुट्नुप्रति एकरत्ति गुनासो छैन

छुट्न त स्वयम् यो दुनिया नै दुनियाबाट छुट्नेछ एक दिन 

साभार : गज्जब  साप्ताहिक 

• Jigyasa media