काठमाडौँ - हङकङ सिक्सेस क्रिकेट प्रतियोगितामा नेपालले एक खेल बाँकी हुँदै क्वार्टरफाइनलमा स्थान पक्का गरेको छ। समूह बी अन्तर्गत अष्ट्रेलियाले इंगल्याण्डलाई ३४ रनले पराजित गरेपछि नेपाल क्वार्टरफाइनलमा पुगेको हो।
पहिले ब्याटिङ गरेको अष्ट्रेलियाले एक विकेटको क्षतिमा १४७ रनको ठूलो योगफल बनायो। जवाफमा इंगल्याण्डले ११३ रन मात्र बनाउन सक्यो, जसका कारण लगातार दुई खेल हार्दै इंगल्याण्ड समूह चरणमै बाहिरिएको छ। यससँगै अष्ट्रेलिया र नेपाल दुवै क्वार्टरफाइनलमा प्रवेश गरेका छन्।
समूह विजेता तय गर्न अब नेपाल र अष्ट्रेलियाबीचको खेल हुनेछ।
नेपालका कप्तान सन्दीप जोराको उत्कृष्ट प्रदर्शनले टोलीलाई पहिलो खेलमै इंगल्याण्डविरुद्ध १० विकेटको जित दिलाएको थियो। जोराले ५० रन बनाउँदै ९८ रनको लक्ष्य विना क्षति ४.२ ओभरमै पूरा गरेका थिए।
यसअघि, इंगल्याण्डले टस जितेर ब्याटिङ गरे पनि ५.५ ओभरमा ६ विकेट गुमाएर मात्र ९७ रन बनाएको थियो।
- Jigyasa media
