काठमाडौँ, ३१ भदौ । सेन्ट्रल एसियन भलिबल एसोसिएसन (काभा) महिला क्लब च्याम्पियनसिपमा नेपाल पुलिस क्लबले उत्कृष्ट प्रदर्शन गर्दै लगातार दोस्रो जित दर्ता गरेको छ। आज माले, माल्दिभ्समा भएको खेलमा पुलिस क्लबले श्रीलंकाको एयर फोर्सलाई ३–० को सोझो सेटमा पराजित गरेको हो।
पुलिस क्लबले पहिलो सेट २५–१६, दोस्रो सेट २५–२०, र तेस्रो सेट २५–२१ को सहज जित हात पार्दै खेल आफ्नो पक्षमा पारेको हो। यसअघि पुलिसले उज्वेकिस्तानको हुमो क्लबलाई पनि ३–० को सेटमा हराउँदै प्रतियोगिताको विजयी यात्रा सुरु गरेको थियो।
पुलिस क्लबले आफ्नो तेस्रो खेलमा भोलि ताजकिस्तानको भिसी डाइमेडसँग प्रतिस्पर्धा गर्नेछ। पुलिस टोलीले यस प्रतियोगितामा महिला भलिबल लिगको च्याम्पियन बनेको हैसियतमा भाग लिएको हो, जसमा गत चैतमा एभरेस्ट भलिबल क्लबलाई हराउँदै पुलिसले उपाधि जितेको थियो।
- Jigyasa media
