काठमाडौं — अखिल नेपाल फुटबल संघ (एन्फा) ले काठमाडौंमा जारी साफ महिला च्याम्पियनसिप अन्तर्गत नेपाल र बंगलादेशबीचको फाइनल खेलको टिकट बिक्री स्थगित गरेको छ। त्रिपुरेश्वरस्थित दशरथ रंगशालामा कात्तिक १४ गते साँझ साढे ६ बजे हुने फाइनल खेलको टिकट अर्को सूचना नआएसम्मका लागि रोकिएको एन्फाले जानकारी दिएको छ।

आइतबारको दोस्रो सेमिफाइनल खेलमा नेपाल र भारतबीच भएको भिडन्तका क्रममा रंगशालाको क्षमताभन्दा बढी दर्शक उपस्थिति हुँदा खेलाडी र दर्शकको सुरक्षा जोखिममा परेको थियो। यसै कारण फाइनल खेलको टिकट बिक्री रोक्नुपर्ने बाध्यता भएको एन्फाको भनाइ छ।

साफको टिकट व्यवस्थापनको जिम्मा पाएको माउन्ट एभरेस्ट स्पोर्ट्स एन्ड इभेन्ट्स प्रालिले रंगशालाको क्षमताभन्दा बढी टिकट बिक्री गरेको आरोप लागेकाले एन्फाले सत्यतथ्य बुझेर मात्र फाइनल खेलका लागि टिकेटिङ व्यवस्था गर्ने निर्णय गरेको हो।

एन्फाले जारी गरेको विज्ञप्तिमा सार्वजनिक सूचनाको उल्लङ्घन गर्दै टिकट बिक्रीवितरण भएमा एन्फा जवाफदेही नहुने उल्लेख छ।

• Jigyasa media