काठमाडौं । रसुवा बाढीपछि बाढी तथा विपद् प्रभावितको उद्धार र राहतका लागि स्थापना गरिएको प्रधानमन्त्री दैवी प्रकोप उद्धार तथा राहत कोषमा ६ अर्ब ३६ करोड ५५ लाख रुपैयाँभन्दा बढी रकम संकलन भएको छ।
प्रधानमन्त्री बालेन्द्र शाहका अनुसार सोमबार दिउँसोसम्म विभिन्न ९ वटा वाणिज्य बैंकका खातामा ५ अर्ब ८७ करोड ९२ लाख २३ हजार ८४२ रुपैयाँ जम्मा भएको छ।
त्यस्तै, हिमालयन बैंक र लक्ष्मी बैंकमा ३१ लाख ९३ हजार २३८ अमेरिकी डलर सहयोग प्राप्त भएको छ। नेपाल राष्ट्र बैंकको सोमबारको विनिमय दरअनुसार उक्त रकम करिब ४८ करोड ६३ लाख ६२ हजार रुपैयाँ बराबर हुन्छ।
दुवै रकम जोड्दा राहत कोषमा हालसम्म ६ अर्ब ३६ करोड ५५ लाख ८५ हजार रुपैयाँभन्दा बढी संकलन भएको हो।
प्रधानमन्त्री शाहले विभिन्न देश तथा संघसंस्थाबाट थप आर्थिक सहयोग गर्ने प्रतिबद्धता प्राप्त भइरहेको जानकारी दिएका छन्। उनका अनुसार सरकारमार्फत विपद् प्रभावित नागरिकको उद्धार, राहत तथा पुनःस्थापनाका लागि आवश्यक स्रोत जुटाउने काम भइरहेको छ।
सहयोगको विवरण सार्वजनिक गरिँदै
सरकारले राहत संकलन तथा वितरण प्रक्रियालाई पारदर्शी बनाउन ‘उद्धार अनुरोध पोर्टल’ सञ्चालनमा ल्याएको छ। उक्त पोर्टलमार्फत स्वदेश तथा विदेशबाट प्राप्त सहयोगको विवरण सार्वजनिक गर्ने व्यवस्था गरिएको छ।
सरकारले बाढीबाट प्रभावित नागरिकको तत्कालीन आवश्यकता पूरा गर्न राहत परिचालनसँगै आगामी पुनःस्थापना र पुनर्निर्माणका लागि समेत स्रोत व्यवस्थापनलाई प्राथमिकतामा राखेको जनाएको छ।
-
Jigyasanepal
