शुक्रबार, चैत २२, २०८१ | जिग्यासा नेपाल

जनकपुरधाम — सूर्य आराधनाको अनुपम पर्व चैती छठ आज बिहान उदाउँदो सूर्यलाई अर्घ्य दिई सम्पन्न भएको छ। विशेषगरी मिथिलाञ्चलमा चार दिनसम्म आस्था, ब्रत र धार्मिक अनुशासनका साथ मनाइने यो पर्व आज धार्मिक उल्लास र श्रद्धासहित सम्पन्न भएको हो।

जनकपुरधामसहित मधेस प्रदेशका सहर र गाउँका तालतलैया, नदी र पोखरीहरू छठ व्रतालु र भक्तजनले भरिएका थिए। गङ्गासागर, अङ्गराज सर, दशरथ ताल जस्ता प्रमुख स्थलहरूमा धार्मिक विधिअनुसार सामूहिक पूजा-अर्चना गरिएको थियो।

यस पर्वको प्रमुख विशेषता— अस्ताउँदो र उदाउँदो सूर्यको आराधना— अनुसार, बिहीबार साँझ अस्ताउँदो सूर्यलाई अर्घ्य अर्पण गरेपछि आज बिहान पुनः जलाशयमा पसेर उदाउँदो सूर्यलाई अर्घ्य दिइयो। व्रतालुहरूले विशेष पकवानहरू— ठकुवा, भुसवा, पेरुकिया, खजुरिया—सँगै फलफूल र भोग सामग्रीको अर्घ्य अर्पण गरेका थिए।

धार्मिक ग्रन्थ अनुसार, सती अनुसूयादेखि द्रौपदीसम्मले यो व्रत गरेका उल्लेख पाइन्छ। पारिवारिक समृद्धि, स्वास्थ्य लाभ र आध्यात्मिक शुद्धताका लागि यो पर्वलाई विशेष मानिन्छ।

चार चरणमा मनाइने छठपर्वमा पहिलो दिन ‘नहाय–खाय’, दोस्रो दिन ‘खरना’, तेस्रो दिन अस्ताउँदो सूर्यलाई अर्घ्य, र अन्तिम दिन उदाउँदो सूर्यलाई अर्घ्य अर्पण गरी ब्रत सम्पन्न गर्ने परम्परा रहिआएको छ।

व्रतालुहरूले जलाशयको किनारमा निर्माण गरिएका छठघाटमा परम्परागत गीत गाउँदै, पूजा सामग्रीसहित आराधना गरे। अघिल्लो रातदेखिको कठोर उपवास र नियम–अनुसार व्रत बोक्ने ब्रतालु महिलाहरूको अनुशासन, श्रद्धा र समर्पणले यो पर्वको विशेषता झनै बढाएको छ।

• Jigyasa media