अछाम । ढकारी गाउँपालिकाका दुई किशोरी शुक्रबारदेखि बेपत्ता भएका अवस्थामा शनिबार साँझ जंगलमा मृत फेला परेका छन्।

ढकारी गाउँपालिका-८ का कमल खड्काकी छोरी ईश्वरी खड्का र उदय खड्काकी छोरी सरस्वती खड्का वडा नम्बर १ को जंगल क्षेत्रमा मृत अवस्थामा भेटिएका हुन्। जिल्ला प्रहरी कार्यालय अछामका सूचना अधिकारी प्रहरी निरीक्षक टेकबहादुर देउवाका अनुसार मृतक किशोरीहरू गाईबाख्रा चराउन शुक्रबार बिहान जंगल गएका थिए।

शुक्रबार साँझसम्म पनि घर नफर्किएपछि परिवार र गाउँलेहरूले खोजी अभियान थालेका थिए। खोजीको क्रममा शनिबार साँझ ६:४० बजे उनीहरू भुइँमा लडिरहेको अवस्थामा मृत फेला परेका थिए। घटना सम्बन्धी सूचना प्राप्त भएलगत्तै प्रहरीले थप अनुसन्धानका लागि डिएसपी ईश्वरी प्रसाद भण्डारीको नेतृत्वमा टोली खटाएको छ।

मृत्युको कारण खुल्न नसकेको र घटनास्थलमा आवश्यक प्रमाण सङ्कलनको काम भइरहेको प्रहरीले जनाएको छ। स्थानीय बासिन्दा घटना रहस्यमय भएको भन्दै चाँडो सत्यतथ्य पत्ता लगाउन माग गरिरहेका छन्।

सुरक्षा सतर्कता र छानबिनको अपेक्षा

यस घटनाले स्थानियस्तरमा त्रास फैलाएको छ भने गाउँलेहरूले बालबालिका र किशोरीहरूको सुरक्षाका लागि विशेष ध्यान दिनुपर्ने आवश्यकता औँल्याएका छन्।

• Jigyasa media