तम्घास (गुल्मी), वैशाख १२ — गुल्मी जिल्लाको धुर्कोट गाउँपालिका–१ स्थित आखररुखमा शुक्रबार दिउँसो भएको आगलागीमा एक चार वर्षीय बालकको दुःखद निधन भएको छ।
स्थानीय गणेश नेपालीको दुईतले गोठमा लागेको आगोका कारण उनका चार वर्षीय छोरा विवेक नेपालीको मृत्यु भएको जिल्ला प्रहरी कार्यालय गुल्मीले जनाएको छ। ढुंगा र माटोले निर्मित गोठ आगलागीले पूर्णरूपमा जलेर नष्ट भएको हो।
प्रहरीको प्रारम्भिक अनुसन्धानअनुसार, बालबालिका खेल्ने क्रममा गोठमा आगो लागेको हुन सक्ने अनुमान गरिएको छ। आगलागीको समयमा विवेककी दिदीले सहयोगको लागि गुहार गरेकी थिइन्। तर, विवेक भने गोठभित्रै लुकेर बसेको अवस्थामा थिए, जसको जानकारी समयमै नपाउँदा उनको ज्यान गएको धुर्कोट–१ का वडाध्यक्ष चेतमान कुँवरले जानकारी दिए।
आगलागीको विस्तृत कारणबारे अनुसन्धान भइरहेको जिल्ला प्रहरी कार्यालयले जनाएको छ। राससबाट
- T
