बर्दिया – बर्दियाको मधुवन नगरपालिका-७ मा बाख्रा चराउन गएकी एक महिलामाथि चितुवाले आक्रमण गर्दा ज्यान गएको छ।
५१ वर्षीया जुनाकुमारी लामिछाने शुक्रबार बिहान बाख्रा चराउने क्रममा चितुवाको आक्रमणमा परेकी थिइन्। घटना नेपाल-भारत सीमाक्षेत्र नजिकै भएको हो।
स्थानीयका अनुसार बिहान करिब ११ बजे चितुवाले महिलामाथि आक्रमण गरेको थियो। चितुवाको आक्रमण देखेपछि स्थानीयले होहल्ला गरेपछि चितुवा भागेको थियो।
घटनाको खबर दिउँसो करिब १:३० बजे मात्र प्रहरीलाई दिइएको जिल्ला प्रहरी कार्यालय बर्दियाका प्रवक्ता डिएसपी ऋषिराम घर्ती मगरले जानकारी दिए।
गम्भीर घाइते भएकी लामिछानेलाई उपचारका लागि जिल्ला अस्पताल गुलरिया लगिएको थियो। तर, अस्पताल पुग्नासाथ चिकित्सकले उनलाई मृत घोषित गरे।
प्रहरी र वन विभागले घटनास्थल आसपास चितुवाको खोजी तथा नियन्त्रण प्रयास गरिरहेको जनाएको छ। स्थानीयलाई वन्यजन्तुसँग सतर्क रहन आग्रह गरिएको छ।
- Jigyasa media
