काठमाडौं । देशका केही भागमा आज वर्षा र हिमपातको सम्भावना रहेको छ। जल तथा मौसम विज्ञान विभागका अनुसार पश्चिमी वायु र पश्चिमी न्यूनचापीय प्रणालीको आंशिक प्रभावका कारण मौसम प्रभावित भएको हो।
बिहानको अवस्था
सुदूरपश्चिम र कर्णाली प्रदेशमा बिहानैदेखि आंशिकदेखि सामान्य बदली भएको छ। पहाडी क्षेत्रमा आंशिक बदली भए पनि तराईका केही भूभागमा हुस्सु र कुहिरो लागेको छ।
दिउँसोको अवस्था
दिउँसो कोसी, वाग्मती, गण्डकी र कर्णाली प्रदेशको पहाडी भूभागमा आंशिकदेखि सामान्य बदली रहनेछ। यी प्रदेशका केही स्थानमा हल्का वर्षा हुन सक्ने मौसमविद्हरूले बताएका छन्।
काठमाडौं उपत्यकामा सम्भावित मौसम परिवर्तन
काठमाडौं उपत्यकामा दिउँसो हल्का वर्षा हुने सम्भावना छ। मौसमविद् मीनकुमार आर्यालका अनुसार दिउँसो २/३ बजेपछि वर्षा सुरु हुन सक्छ।
तापक्रम र चिसोको असर
बिहान ६ बजे काठमाडौंको न्यूनतम तापक्रम ७.८ डिग्री सेल्सियस मापन गरिएको छ। दिउँसो तापक्रम १८ देखि २० डिग्री सेल्सियसको हाराहारीमा रहने अनुमान गरिएको छ। बदली र वर्षाका कारण काठमाडौंमा चिसो महसुस हुनेछ।
रातिको अवस्था
राति कोसी, वाग्मती र गण्डकी प्रदेशका पहाडी भूभागमा आंशिक बदली रहनेछ। उच्च पहाडी तथा हिमाली क्षेत्रमा हल्का हिमपातको सम्भावना छ।
सावधानी अपनाउन सुझाव
विभागले चिसोबाट बच्न सावधानी अपनाउन र आवश्यक तयारी गर्न सर्वसाधारणलाई आग्रह गरेको छ।
- Jigyasa media
